Rulienne Arends, Trahador Preventivo:
*Atencion di mayornan ta sumamente importante!
ORANJESTAD (AAN) – Rulienne Arends, Trahado Preventivo di Fundacion Anti Droga Aruba (FADA), den entrevista cu DIARIO a mustra su preocupacion, unda cu door di bishita e adictonan ambulante pa haci nan documentarionan basa riba bida real, nan ta constata cu enberdad, hopi mucha masha jong, ta circula riba caya.
FADA constantemente ta den contacto cu otro organizacionnan pa wak di ki forma, apesar cu FADA ta traha den area di prevencion, nan por yuda vooral si ya tin un hoben cu ta riba caya.
“Kico nos por haci, Pues ta un enfoke di parti di FADA, nos tin charlanan cu ta enfoca un tiki mas tocante nos hobennan, papiando den edad di 13 aña pa 17, cu ta e grupo mas dificil pa combersa cu ne.
E campaña di Siman di Locura ta uno cu ta mas cerca di nos muchanan di scol basico, pero muchanan di scol secundario no ta participa asina facil den un campaña. Pa nan nos tin otro tipo di campaña; nos ta yega un tiki mas cerca di nan, toch, cu nos charlanan y nos ta haci nos charlanan diferente. No ta djis charla di informacion den e caso aki, atrobe pa purba di no cay den e gara y ta riba caya. Berdad, nos ta wak cu e hobennan ta esnan cu ta mas riba caya actualmente, pero tin diferente factor tambe cu ta hunga un rol akinan, unda cu no solamente FADA, pero sigur tin otro fundacionnan cu tambe ta purbando yega cerca di e hobennan. Lamentablemente, y nos a bisa esaki caba, nos ta bis’e un biaha mas ‘nos hobennan ta hopi followers akinan na Aruba”, Rulienne Arends a subraya.
Esey FADA ta ripara y nan mester inculca den nan un tiki mas di self-esteem, pa nan para mas fuerte riba nan pia, bisa NO. No bay tras di un trend, pensa un rato riba e consecuencia. “FADA tin hopi proyecto tras di esaki, pero mi sa cu tin hopi organizacion, por ehemplo un telefon pa hubentud, cu tambe ta enfoca riba diferente di e temanan aki”, Rulienne Arends a enfatiza.
El a agrega cu organizacionnan por keda haci esaki constantemente, pero e rol di mayornan na cas, ta sumamente importante. “Un organizacion su so, no por hacie. Nos por duna e muchanan aki tur e tips y tools, bin cu diferente campaña grandi asina aki, tur aña, pero si na cas nan no ta tuma e tempo, papia cu e yiunan e chens ta hopi grandi cu nan ta bay cay den algo”, Rulienne Arends a señala.
El ta sugeri mayornan cu si na cas nan no sa con papia cu nan, no tin informacion riba e tema tuma contacto cu FADA.
