ORANJESTAD (AAN): Tabata Diadomingo banda di 1:25 am, cu un unidad di Polis di Noord ta coriendo riba Irausquin Boulevard bayendo panort.
Net ora cu nan a yega banda di Palm Beach Plaza, nan a haya peticion pa bay na The Village Mall pa un pelea.
Ora cu Polis a yega den e parkinglot di The Village Mall, nan no a topa cu ningun pelea. Nan a controla full e parkinglot, pero a haya nada. Net ora cu Polis ta bayendo pa drenta nan unidad bek, algun hende a cuminza grita Polisnan, cu un homber a wordo hinca banda di South Beach.
Polis di leu por a mira un grupo di hende para rond di un persona. Esaki ta na e area principal di South Beach Center, cu ta conecta e parkinglot.
Agentenan a yega cerca, y bin haya un homber drumi riba un di e mesanan eynan. Mesora a pidi Central pa manda Ambulans cu urgencia. E oficialnan a mira cu e homber aki tin varios mancha di sanger na parti dilanti di su Shirt blanco. Testigonan a bisa Polis, cu e victima di inicial P. tin un hinca basta grandi na su lomba. Polis a tira un bista y a nota cu e victima tin algun hinca na su barica, y tambe un hinca grandi y grave na su lomba.
Polisnan mesora a puntra e homber si acaso e sa kende a hink’e. E homber a contesta cu e sa bon bon kende a hink’e. E victima a bisa Polis, cu ta trata di e agresor di inicial B. Polis a puntra e victima si e por describi e sospechoso B. aki.
E victima a bisa Polis cu e agresor B. tin color di cuero blanco, y ta core un Nissan blanco.
Ambulans a yega y nan a cuminza traha pa stabiliza e victima, y prepara pa move cu urgencia pa Hospital cune. Mientras cu Polis ta wardando pa e Paramediconan bay cune, diripiente un persona a bin notifica Polis cu tin un homber cu hopi sanger na su cara, cu un ‘hoodie’ shinishi, ta haciendo fastioso net banda di e unidad di Ambulans. E persona a bisa cu e homber ey haciendo fastioso, ta actuando comosifuera e ta bao influencia di droga of algo otro, mirando su comportacion.
Polis a cana bay na e Ambulans, y a mira e homber. Nan a bay mesora den su direccion. Nan a mira e homber aki ta bulando, y haciendo movimentonan raro cu su mannan. Agentenan a yega cerca y a bay papia cune. Pero cu su forma di actua, Polis a cuminza sospecha cu e ta bao influencia di droga. Tambe a mira cu e tin sanger na su cara y paña, y e ta tur na sudor. Aki a lanta sospecho cerca Polis, cu e homber aki lo ta envolvi den e prome informe di pelea.
Prome cu Polis a bisa e homber cu nan ta detene pasobra e ta burachi riba caya, ata e persona a cuminza rek un careda y core bay pariba. Polis tambe a cuminza core su tras, y nan a mira con el a zwaai algo tira den mondi cu tin pariba di e parkinglot.
Na un forma tactico Polis a yega cerca y a manda e homber na suela. E sospechoso a cuminza resisti fuertemente contra Polis. Ora cu porfin a pone boei na su mannan, a bay check den e mondi y a descubri cu ta un cuchiu el a zwaai benta abao.
E homber B. a wordo deteni basa cu el a viola Articulonan 3:52 y 2:133 di Codigo Penal, y Articulo 1 di Ley di Arma.
Net ora cu Polis tabata na suela ta atende e sospechoso, e agente a sinti con un otro hende a yega cerca y pusha e agente cu forza na su lomba. Tambe a mira con e homber desconoci aki a trata varios biaha di scop e sospechoso cu e momento ey Polis tabatin na suela.
Aki Polis a duna e persona ordo pa e bay di eynan, pero e no a mustra comprension y tabata kier a bolbe scop e sospechoso.
Relaciona cu e acontecimento nobo aki, Polis a detene e homber P. tambe pasobra el a viola Articulo 2:137 y Articulo 2:138 di Codigo Penal di Aruba.
Tur dos sospechoso a wordo hiba pa Warda di Polis, unda Fiscal Auxiliar a duna ordo pa tur dos wordo encarcela pa mas investigacion.
