Ta bay drecha e trapi cu ta situa na Rodgers Beach cu arte di mosaic

Minister Oduber: San Nicolas tin e potencial pa bira un di dos capital turistico di Aruba

*Construccion di Hotel Secrets ta continua 

ORANJESTAD (AAN): Dialuna mainta Minister di Turismo y Salud Publico sr. Dangui Oduber tabata presente na e trapi na Rodgers Beach caminda e mandatario a anuncia cu lo bay drecha e trapi cu ta situa na Rodgers Beach cu arte di mosaic.

            Di e forma aki ta keda haci inversionnan den e mantencion y mehoracion di e infrastructura den e area aki mescos cu tabata e caso na Rodgers Beach cu a tuma lugar exactamente 1 aña pasa, e mandatario a señala. E trapi di Rodgers Beach tabata mal estado y deterioro y pesey Minister Oduber a tuma e decision pa renoba e trapi aki invertiendo asina aki den producto Aruba. E trabaonan pa renoba e trapi a wordo anuncia 20 October 2021 y awe nos tin un bunita trapi restaura.

            E siguiente fase di e trapi cu lo ta ponemento di mosaic lo wordo financia cu fondonan di Aruba Tourism Authority (ATA). E proyecto di renobacion di e trapi caminda ta bay haci uzo di artistanan di mosaic local y internacional y lo keda bou encargo di Tito Bolivar.

            E proyecto aki ta den bon cooperacion cu e parke marino. Minister Oduber su vision y maneho ta pa sigui atrae turistanan di “low volume high impact”, e turistanan cu tin un entrada anual di mas di 150 mil dollar pa aña. Pesey ta hopi importante pa sigui inverti den e producto Aruba pa mantene e spectativa di ta un destinacion di calidad.

            Na momento cu Minister Oduber a drenta Gobierno na 2017, Gobierno tabata tin un vision y un masterplan pa e area di Sero Colorado y tambe San Nicolas. Den esaki a inclui e proyecto di Baby Beach fase 1, 2 y 3, a inclui e renobacion di e Oficina di turismo na San Nicolas. Tambe a introduci e festival cultural di Island Fest cu lamentablemente mester a para temporalmente door di e pandemia. Awor ta percurando pa mehora henter e area di Rodgers Beach mescos ta e caso di Baby Beach.

            Minister Dangui Oduber a menciona cu e construccion di hotel Secrets ta continua, tambe cu pronto e construccion di un otro boutique hotel tambe lo cuminsa. Pues tin henter un desaroyo hopi positivo pa San Nicolas caminda gobierno ta inverti y sector priva na su turno tambe ta duna di nan banda.

            Minister Oduber a sigui bisa cu Gobierno ta kere cu San Nicolas tin e potencial pa bira un segundo capital turistico di Aruba.

            Finalmente e mandatario kier a gradici ATA pa kere den e proyecto aki y ehecuta e vision y maneho di Ministerio di Turismo, tambe DOW, DIP y Ministerio di Infrastructura pa e bon cooperacion brinda.