Hospital cu  anochi informativo ‘Bida despues di stroke’ diahuebs awo

En conexion cu Dia Mundial di Stroke un charla riba diahuebs 27 di oktober

ORANJESTAD (AAN): Segun statisticanan di cinco causa di morto mundialmente ta stroke. Pa e motibo aki no a duda ningun momento pa organisa den cuadro di dia mundial di stroke un charla informativo cu ta completamente gratis, pa asina para keto y enfoca riba un tema asina importante.

            Pa cu esaki lo tene  diahuebs awo, 27 di oktober un anochi informativo na MFA Paradera di 6pm pa 9pm cu ta hiba e tema 'Bida despues di stroke'. Un iniciativa cu ta wordo carga pa e team completo di stroke na Horacio Oduber Hospital. E team aki ta ser forma pa e team di neurologia y  tambe di revalidatie.

            Durante e anochi informativo aki lo papia tocante diferente topico manera entre otro e factornan di riesgo, prevencion y tratamento. Awendia tambe ta mira hopi stroke cu ta ripiti y alabes ta alarmante cu e edad cu ta haya un stroke ta bahando. Si un pashent haya stroke y ta sobrevivi , e por keda cu retonan neurologico cu ta hopi fastioso y cu por influencia su calidad di bida pa semper. Pa e motibo aki e biaha aki a scohe pa e tema ‘bida despues di stroke’.

            Hopi famia tin dificultad pa cuida nan ser keri cu a haya un stroke. Lo papia di e consecuencianan, e situacion social y tambe e situacion financiero. Tambe lo papia di e peso riba e famia pero tambe riba e pashent. Famianan ta encontra cambionan grandi pa cu esaki y pues ta importante pa mira e situacion completo. Nos profesionalnan lo t’ey tambe pa contesta cualkier pregunta.  

            E team di stroke na Hospital ta dedica na nan pashentnan y ta enfoka riba duna conseho cu e meta preventivo pa asina evita stroke pero alabes t’ey pa yuda y conseha na momento cu un persona haya un stroke. Hospital y su team semper t’ey pa brinda asistencia medico na tur hende cu mester di esaki 24/7 pero sigur kier duna informacion con por preveni. No perde e anochi aki y asisti pa bo ta bon informa tocante stroke y e bida despues di un stroke. Y corda cu entrada lo ta completamente gratis!