Ataniro lo bay tin un School Tour:
ORANJESTAD(AAN): E artista Janiro ‘Ataniro’ Eisden ta bay forma parti di e proyecto ‘School Tour’, unda cu entre otro via musica ta bay comunica cu hobennan di scolnan secundario, pa asina nan por comunica bek y papia riba e tema di salud mental.
Ataniro ta bay haci esaki hunto cu otro artista conoci, Levi Silvanie, kende a wordo inspira pa cuminza cu e proyecto despues cu e mes a pasa den momentonan dificil cu a afecte mentalmente.
Durante un conferencia di prensa, Ataniro a splica cu el a experiencia un session di Silvanie na su cas y cu e ta un session cu ta yega cerca di bo.
“Door di musica bo ta hayabo ta expresa bo mes y bo no ta wordo forza”.
E energia cu nos ta comparti cu otro ta algo hopi positivo, segun Ataniro.
El a sigui bisa cu hendenan en general pero sigur hende homber tin miedo di papia cierto cos cu hendenan di cual bo sa cu nan no ta bay duna un reaccion positivo, of bo sa cu nan no ta bay comprondebo.
Segun Ataniro, den e tipo di sessions aki, manera cu ta bay wordo duna na e scolnan, bo ta sintibo na cas.
“Bo ta sintibo alivia”.
Hopi biaha nos como hende homber na cas ta wordo mira como Superman y cu nos tin un mantel di hero bisti door di cual nada por pasa nos.
Nos tambe kier mustra esey na cas, pero tin biaha ora bo smile bo famia sa cu e smile ey ta fake, segun e artista.
El a sigui bisa cu tin biaha e hendenan homber ta sinti cu nan no tin hende pa papia cune.
Ataniro a indica cu e ta bay ta hunto cu Silvanie na sessionnan duna anochi, unda cu via musica lo intercambia pensamento y expresionnan.
El a bisa tambe cu e sessionnan aki no ta un ‘quick fix’, sino cu mester sigui tuma mas paso pa traha riba salud mental.
