Thomas Ruiz, Secretario di VRA, cu yamada pa Ministerio Publico
- Nan tin un tendencia di shoemel cu speed y consecuencianan por ta fatal!
ORANJESTAD (AAN) – Secretario di VRA (Verening Rijscholen Aruba) señor Thomas Ruiz, den entrevista cu DIARIO a haci un peticion na Ministerio Publico (OM) pa bin dilanti y splica con e Ley di scooter electrico ta traha den e sistema di trafico di Aruba, y splica pueblo con e ley aki ta hinca den otro.
Ruiz a señala cu for di basta tempo mester tin claridad al respecto, pasobra VRA a premira caba cu lo tin problematica den esaki. “Locual nos a saca afo di e ley ta cu hopi di e aparatonan aki, no ta atene nan mes na e leynan vigente. Mas ainda, nan tin un tendencia di shoemel (bruha) cu speed. Nan ta bin for di e fabrica cu 25 kilometer, nan ta saca chip of ta shoemel cu e machine, y mande pa 60-80 sin premira e consecuencianan fatal cu esaki por tin”, Ruiz a subraya.
El a señala cu ora e ta scucha di accidente cu e aparatonan aki, e ta puntra su mes si Departamento di Trafico ta tuma e autonan aki den beslag pa haci investigacion riba ki speed e scooternan aki ta coriendo? “Pasobra na Hulanda, mi sa cu tin ley cu ta bisa cu asina bo bruha cu speed, e ta castigable for di prome, y seguro no ta cover tampoco. Tambe nos tin cu, door di dialogo, papia cu otro, yega na consenso di trece claridad riba e asunto akinan, nos por preveni hopi cos. Pero si dialogo no tuma lugar, nos ta keda den mesun problema”, Ruiz a expresa.
El a agrega cu den e charlanan cu nan ta duna, VRA ta purba di alerta pueblo riba e problematica cu nan ta wak cu e scooternan y principalmente, cu e fenomeno di bateria cu ta pega candela y por rementa. Den hopi di e Islanan ta regala e scooternan aki na hobennan pa nan bay scol, pasobra e ta un metodo alternativo mas barata cu transporte publico, pero e tin su consecuencianan fatal si no sa con pa recarga e mashin aki. Y por wak’e claramente na Merca, por ehemplo.
