ORANJESTAD (AAN): Vereniging Rijscholen Aruba recientemente a cuminza duna charla riba trafico y segun Thomas Ruiz, esaki a haya un bon acogida.
El a splica cu e intencion ta pa sigui duna charla den barionan pa ta mas cerca y dialoga cu pueblo mes, pa scucha locual nan tambe tin di bisa.
“Nos ta siña hopi tambe di e poblacion y pa nos sorpresa nos a haya un acogida hopi grandi”, segun Ruiz, kende a indica cu nan a cuminza na OPPA, despues a bay Centro di Bario Bubali y Centro di Bario Playa Pabo.
E proximo charla di Vereniging Rijscholen Aruba ta bay ta na Centro di Bario Dakota, riba 20 y 27 di September di 7’or te cu 9’or di anochi.
Ruiz a indica cu hopi biaha e charla ta dura mas cu 2 ora, pasobra esnan presenta ta haci varios pregunta y esey tambe ta e meta.
Algun di e preguntanan mas frecuente cu ta wordo haci ta tocante di rotonde, unda cu tin bastante disgusto riba con cierto automobilista ta core riba rotonde.
“Hopi hende no ta compronde e reglanan cu tin riba rotonde, principalmente di duna señal”.
Nos ta haya hopi pregunta tambe riba cierto caminda den bario, manera na Bubali, banda di e cruzada di ex veld di Nacional, segun Ruiz.
El a splica cu for di basta tempo tin peticion pa pone borchi eynan, pasobra ta un caos.
“Nos ta haya hopi pregunta tambe riba seguro y locual nos ta stress hopi ta riba asuntonan relativamente nobo, manera autonan electrico y e bicicletanan electrico, unda cu bo no ta scucha e bicicletanan aki.
Locual tambe ta preocupa nos ta e tendencia cu tin na Europa y Merca, unda cu den varios caso e bateria di autonan electrico ta coi candela, segun Ruiz.
El a splica cu si bo no carga e baterianan aki como debe ser, nan por produci candela.
Segun Ruiz, e tipo di candela aki bo no por page djis asina.
Durante e charlanan lo duna tur tipo di informacion valioso y preventivo y pesey Vereniging Rijscholen Aruba lo sigui organiza mas charla den diferente bario.
