ORANJESTAD (AAN): Durante e conferencia di prensa di Gobierno di tur Dialuna, minister di Enseñanza Rudy Lampe a reacciona riba e veredicto di huez den un caso cu SKOA a cuminza.
“Skoa a bolbe perde un caso cu nan a entama contra minister di Enseñanza”.
Mi a wak un email di director di SKOA, pero dia 12 di Januari mi mester a reuni cu nan y nan a cancela.
Mi a keda pidi reunion cu nan y nan ta cancela esaki y te cu dos siman pasa mi a bolbe pidi pa un reunion y nan a bisa cu nan no ta reuni, segun Lampe.
El a splica cu full 2021 e no a logra ni 1 reunion cu SKOA, pero bo ta mira si cu SKOA ta reuni cu Prome Minister, siendo cu Prome Minister no por tuma decision pa enseñanza.
“Si bo wak esaki bo ta ripara cu ‘there is something wrong’ e ora ey”.
Ta nenga reunion cu minister di Enseñanza y ta bay acerca Prome Minister y no kier sinta cu minister di Enseñanza, segun Lampe.
El a splica cu e veredicto a confirma cu di berdad there is something wrong cu SKOA.
“Atrobe huez ta bisa cu SKOA a actua contra ley pa loke ta salario di e trahadornan di limpieza”
E huez ta bay mas leu ainda y ta bisa cu e probabilidad ta grandi cu SKOA su bezwaar lo sigui wordo rechaza, si nan dicidi di sigui mas caso, segun e mandatario.
El a sigui bisa cu e ley ta hopi cla y ta bisa cu tur locual ta personal di limpieza ta cay bao di ‘exploitatie subsidie’.
“SKOA ta trece dilanti cu nan no tin suficiente placa pa paga tur e gastonan di personal di limpieza, pero esey no ta pa falta di subsidio di Gobierno”.
Esey ta pa falta cu nan no kier cumpli cu ley.
Si bo ta cumpli cu ley lo bo no tin e problema aki.
Contra ley a duna e trahadornan aki un status di ambtenaar, anto pesey aworaki nan no por cumpli cu nan obligacionnan financiero, pasobra no tin base legal pa esey.
Bo no por bay pidi mayornan pa placa pa cover pa locual bo ta haci fout, segun Lampe.
El a sigui bisa cu envez cu SKOA coregi nan fout, nan ta sigui.
E mandatario a bisa tambe cu e rapport cu el a pidi Centrale Acountantsdienst (CAD) traha ora cu el a ripara cu tin algo cu no ta cuadra, a mustra cu tin mas ‘puito’.
El a splica cu a resulta cu e trahadornan a haya pago dobel, pero SKOA no a avisa nada y no a manda e placa bek.
“Ora cu e rapport di CAD a ripara esey y nos a mustra SKOA cu esey no ta cuadra, nan mester sea manda e placa bek of traha un areglo pa paga e placa bek”.
Nos a sugeri pa nan paga e suma bek poco poco, pero nan a bay corte y huez a duna nos razon den e sentencia ey, segun e minister.
