ORANJESTAD (AAN): Lagando un banda e parti economico, Premier di Aruba Evelyn Wever-Croes a referi dialuna atardi, den un conferencia di prensa extraordinario, tambe na e efecto financiero cu Covid-19 a trece cu ne.
El a remarca cu ainda Aruba su finansas ta leu di e recuperacion. Pesey pa awor ta enfocando riba e parti di salud y economia pero despues cu esaki tuma lugar lo cuminsa traha riba e finansas di Pais Aruba.
Cada kwartaal, keto bay Aruba ta depende di e sosten di likides di Hulanda. E entradanan di impuesto no ta suficiente pa cubri tur gasto, a remarca.
Pesey aworaki ta preparando pa e peticion pa e asistencia financiero di Hulanda pa e di tres kwartaal di e aña aki.
Pa 1 di Juli mester di e sosten aki pa loke ta e lunanan di Juli, Augustus y September. Den Juni, e peticion mester wordo aproba pa Rijksministerraad.
E medidanan cu a bin ta implementando pa por cumpli cu Hulanda ta keda na vigor 'tot nader order'. Akinan ta referi na e parti di cortamento di salario di e empleadonan publico y semi-publico.
E vakantie uitkeuring di e luna di Juni pa e empleadonan publico e placa tey caba pa wordo paga. E ambtenaarnan lo haya mescos cu aña pasa 50%.
E mandatario a confirma cu e placa tey mescos cu e salarionan. Tur ta garantisa, a enfatisa. "Pues akinan tampoco mester tin preocupacion pues e placa ey nos a haye den e tranche di e di dos kwartaal".
Mientrastanto ta sigui na mesa cu Hulanda den cuadro di e Landspakket y di COHO como tambe di RAFT. Loke ta purbando ta trece stabilidad y trankilidad den cada hogar. Pesey awor ta cuminsa tambe flexibilisa, pero mester tene cuenta cu e virus tey ainda.
Covid-19 den e ultimo aña a costa e bida na Aruba di 107 persona. E ta un virus cruel cu a causa hopi daño. "Ta parce cu nos tin'e domina pero nos mester sigui cuida. Gobierno ta hala atras awor. Gobierno ta retira e toque de queda y varios otro medida, pero abo si mester sigui cuida pasobra cu e virus tey y e virus por causa hopi daño", Evelyn Wever-Croes a finalisa bisando.
