ORANJESTAD (AAN): Prome Minister Evelyn Wever-Croes a anuncia dialuna atardi algun cambio pa loke ta e medidanan den cuadro di Covid-19.
El a duna di conoce cu pa awor e parti di salud aki ta domina y tin cu bay enfoca riba vacunacion pa asina por yega te na e meta di 85% .
Ta bay bin un plan extenso di vacunacion riba con pa yega mas cerca di e ciudadano, a bisa. Esaki lo wordo publica pronto.
Pa lo sigui enfoca riba e parti economico ya cu ainda tin hopi hende cu ta depende di FASE. Lo keda mantene FASE ya cu no tin motibo pa kit'e aworaki. FASE no ta un proyecto cu Hulanda ta financia. Ta un proyecto cu Gobierno di Aruba ta financia hunto cu e cortamento di salario cu tin den sector publico y sector semi-publico.
Gobierno ta trahando riba un proyecto caminda FASE lo converti den TIO, pero esaki ta algo cu no ta cla ainda. Mientrastanto, FASE lo sigui existi y no tin ningun motibo pa kit'e aworaki, Wever-Croes a splica.
Subsidio di salario tambe ta bay keda te cu fin di aña pa esnan cu tin mester di dje. Cada luna ta mira cu mas doñonan di trabao ta para riba nan propio pia atrobe financieramente y no ta haci uzo di subsidio di salario mas.
Den esaki, a laga sa, ta mira un recuperacion di 55% y esaki ta algo basta positivo.
El a referi tambe na pakete di cuminda cual tabata den man di Cruz Cora. Entrante 1 di Juli 2021 gobierno ta bay sigui cu e programa aki.
Tene cuenta cu entrante dia 7 di juni, por registra na Fundacion Pa Nos Comunidad pa asina por bin na remarke pa haya e pakete di cuminda entrante 1 di Juli 2021.
Wever-Croes a remarca cu Hulanda a indica cu ta dispuesto pa sigui financia (regala) esaki pa un periodo di 3 pa 4 luna. Despues di e periodo aki, Aruba mes lo 'take care' di e proyecto.
