Venezuela kier habri e ecosistema fragil di isla La Tortuga pa inversion priva

CARACAS: President Nicolas Maduro a anuncia e siman aki, cu e pais tin prepara un proyecto den tur detaye pa atrae inversion y promove turismo na isla La Tortuga,

cu ta ubica riba Lama Caribe, un tiki mas pabao di Isla di Margarita, y cu tin un ecosistema hopi delicado.

    “Venezuela tin un proyecto maraviyoso, Venezuela tin un isla un poco mas grandi cu Aruba, esta e isla La Tortuga, y e ta virgen pa inverti, pa haci un turismo ecologico, sostenible, feliz, adapta na cultura, costumbernan, gastronomia, religion, y bida pa cualkier pueblo di mundo,” e president a bisa durante Feria Internacional de Turismo na Venezuela.

   Relaciona cu esaki, el a sigur cu entre Januari y Maart lo habri un porta pa mustra e proyecto na e isla, cu tin como 156 kilometer cuadra, compara cu e 180 km2 di Aruba, aunke cu e president a bisa net lo contrario.

   “E lo bay ta un di e proyectonan mas poderoso di economia venezolano pa siguiente 50 añanan,” y el a agrega cu e lo bay bira “un ehemplo turistico pa mundo”.

   E promesa di habri La Tortuga, cu ta e di dos isla mas grandi di Venezuela, ta un proposicion bieu cu na 2005 caba a wordo anuncia pa prome biaha door di Hugo Chavez, ora cu e tabata president di Venezuela e tempo ey.

   Na 2017, Maduro a anuncia cu lo bay desaroya e isla, y cu Gobierno ta trahando riba un proyecto ‘sostenible, no contaminante’ y ‘ecologico’ pa e region ey, cu ta un promesa similar cu el a lanza e siman aki.