ORANJESTAD (AAN): Entrante 2022 e Venezolanonan tin di bay pidi un permiso special pa viaha pa cualkier pais di zona Schengen, na Europa.
Esaki mester wordo emiti via e sistema di “European Travel Information and Authorisation System (ETIAS) cu a wordo crea door di Union Europeo.
Segun e website oficial, Union Europeo a crea e sistema aki “pa aumenta e proteccion di e region contra posible atakenan terorista.” E autorizacion di viahe ETIAS ta necesario pa por drenta e 26 paisnan miembro di e Zona Schengen, y lo drenta na vigor den e lunanan final di 2022.
“Un di e metanan principal ta cu e permiso lo bay contribui na seguridad di fronteranan Europeo. E lo facilita e identificacion di posible menazanan y riesgonan asocia cu hendenan cu kier viaha na cualkier di e paisnan den Zona Schengen.
Pesey mes, e Venezolanonan cu ta pidi permiso pa drenta Europa, lo tin di yena un formulario di solicitud ETIAS. E informacion aki lo wordo verifica pa varios database di seguridad, prome cu nan dunabo OK pa por drenta.
“Introduccion di e permiso lo no modifica transito liber, pero lo bay ta un rekesito obligatorio pa drenta Europa,” segun a ser mustra.
E viaheronan di paisnan eligible, incluyendo Venezolanonan lo mester registra online y unavez cu e wordo aproba, lo por bay pasa te maximo di 90 dia, dentro di 3 luna cu e permiso wordo duna, na e paisnan cu ta miembro di Zona Schengen.
E documento electronico lo bay tin un validez pa 3 aña consecutivo, of te ora cu e paspoort Venezolano caduca y cu ta asocia cu e ETIAS.
Di otro banda, autoridadnan Europeo ta recomenda pa busca e permiso aki por lo menos 3 dia prome cu e fecha cu bo tin pa viahe. Esaki ta pa cubri e tempo di procesamento, deteccion, y entrega.
E paisnan cu ta forma parti di Zona Schengen ta Alemania, Austria, Belgica, Dinamarca, Estonia, Finlandia, Francia, Grecia, Hulanda, Hungria, Italia, Islandia, Letonia, Liechtenstein, Lituania, Luxemburgo, Malta, Noruega, Polonia, Portugal, Republica Checo, Suecia, Slovenia, Spaña, y Suiza.
