Apertura di exhibicion ‘Apasionada’ a sorprende tur hende cu mezcla di arte visual cu musica y baile

Yahaira Maduro cu exitoso Pop-Up Art Show

ORANJESTAD (AAN): Recientemente a tuma lugar na Cas di Cultura, e exhibicion di e artista Yahaira Maduro cu el a yama “Apasionada”.  E prome anochi, el a haci esaki pa invitadonan so, y el a crea un berdadero Pop-Up Art Show.

   E coleccion “Apasionada” ta un fusion entre arte abstracto y Pop Art y ta consisti di tres sub collections: e “Main Collection”, e “With All My Heart Collection” y e “Petite Oeuvre Collection”.

   Manera DIARIO a splica anteriormente, esaki a bira Yahaira su di 2 ‘solo exhibition’ na Aruba, despues di su exitoso solo exhibition yama “Joie de Vivre”, cual a worde teni na December 2020. Despues di esaki Yahaira a participa tambe cu diferente di su obranan riba plataforma internacional, como artista invita door di galerianan di arte renombra na Spaña, Francia y Italia.

   Pa aña 2022 ya tin un invitacion riba mesa pa Yahaira participa na e “Art3F Monaco International Contemporary Art Fair 2022”.

   Invitadonan na e apertura di “Apasionada” a worde seduci pa experiencia pasion atraves di nan sentidonan, door di mira y admira e pinturanan cu colornan, textura, contraste y movimientonan vibrante,  inhala e fragrancia exotico di e ‘fruta di pasion’ atraves di e decoracion, saborea e champaña cu un toke diferente di passionfruit den dje y por ultimo scucha e musica exitante cu a acompaña e apertura.

   E anochi di apertura a sorprende esnan presente cu un mix excepcional di arte visual cu musica, baile, poesia y un Art Runway. Pa inicia e inauguracion di e exhibicion, Ariana Croes a realisa un bunita lyrical solo dance yama “Mariposas Blancas”. el a worde sigui pa un baile contemporaneo di Club di Movimiento, yama “Splash of Color”, ambos cu choregrafía di Orwin Gomes. Despues di esaki, e stem apasiona di e poeta invita, Veronica Fabiola Romero Borges, a resona den e declamacion di su poesia “Apasionada”.

   Loke a culmina e apertura tabata e impresionante “Art Runway”, caminda modelonan a cana riba e red carpet mustrando obranan di e coleccion “With All My Heart”, acompaña pa musica cu tabata complementa e show fantasticamente. Na final di e runway por medio di e blacklight cu a worde sendi, e publico por a admira e pinturanan ilumina fabulosamente cu colornan neon vibrante.

   E dos dianan siguiente, publico en general por a disfruta di e exhibicion, cu a worde dedica na Señora Lourdes Maduro Albus, mama di Yahaira, un persona cu hopi diferente talento y cu desde chikito a fomenta creatividad y pasion pa arte serca Yahaira. Loke sigur a resalta durante e exhibicion ta e mensahe na nos tur pa sigui nos curazon y biba nos pasion den bida.

   Un palabra di gratitud ta bay na tur e colaboradornan pa e exhibicion aki por a bira un realidad, esta: DiMondi Aruba, Mensonides Art Supply Aruba, Boulevard Events, Club di Movimiento y Orwin Gomes Dance Choreographer.