ORANJESTAD (AAN) – Un biaha mas DIARIO a haya reaccion di personanan 40 plus, pa puntra ki informacion tin di Departamento di Salud (DVG) tocante e booster pa esnan den edad di 40-49 aña.
Algun persona a yama DVG pero segun nan, nan no a logra pa un hende coi e yamada. DIARIO tampoco a haya mas informacion, y posiblemente esaki lo bira conoci e prome siman di Januari, pasobra trahadornan publico ta di vacacion te dia 2 di Januari.
En todo caso, tur hende mester sigui cuida curpa, no obstante e vacuna incluyendo e booster, y berdad ta di spera cu for di inicio di aña nobo, e trend di vacunacion sigui pa henter e comunidad, of alomenos un mayoria grandi.
Un comentario cu a wordo haci, ta cu na e momentonan aki den hopi empresa tin entre dos pa seis trahador den cuarentena, y algun cu tin e virus, y nan ta asumi cu esaki a plama na pia di trabao mes. Te ainda no a bin cu e medida pa traha na cas, pero si e virus sigui plama no tin nada di straño cu lo mester bolbe traha for di cas mes.
