ORANJESTAD (AAN): Pa algun tempo el a labora na Hard Rock Cafe na Aruba unda el a cera hopi amistad. Ta trata aki di Alberto Araujo kende ta procedente di Venezuela.
Despues di a traha na Hard Rock na Caracas, el a bay na Isla de Margarita. Despues di esey el a bin Aruba, unda el a sigui desaroya su mes den maneho.
Despues di esey, el a bay pa Hard Rock Cafe na Lima (Peru). Despues di esey el a bay pa Hard Rock Cafe na Merca. Y awor un Hard Rock Cafe nobo a habri na Northwest di estado di Indiana. E yama Hard Rock Casino Northern Indiana cu tin tambe un Hard Rock Cafe restaurant paden di e casino cu a costa $300 miyon pa construi. Tabata dia 14 di Mei 2021 cu el a habri oficialmente.
Alberto Araujo ta e general manager di e Hard Rock Cafe nobo aki. Awe Dialuna 14 di Juni ta exactamente un luna cu nan a habri, y alavez nan lo celebra e hecho cu esaki ta e di 50 aniversario ora cu e prome Hard Rock Cafe a habri na Londres, Inglatera. Nan tur lo tin bebidanan cu yama ‘Hurricane’ den nan man pa saluda e momento.
Segun Araujo, tur e lugarnan unda el a traha ta sirbi e mesun receta pa e bebida di ‘Hurricane’, cu ta realmente un tipo di rum punch. Nan ta no djis delicioso, pero tin hendenan famoso cu a bebe esaki.
Na e Hard Rock Cafe na London cu ainda ta habri, un di e personahenan di mas famoso cu clientenan kier saca potret cune ta Rita Gilligan, un waitress cu a traha y ainda ta trahando eynan desde e prome dia di su apertura, esta 14 di Juni 1971.
Segun Alberto Araujo, ora cu el a planea su menu pa Hard Rock Cafe na Northern Indiana, mayoria di e popular cumindanan tey, pero tambe a agrega algun “favoritonan local” pa eynan, e.o. un fried chicken sandwich pica na honor di e Jackson Five.
