Fundacion Alzheimer - ORANJESTAD (AAN): Den hopi pais e topico di discusion di fin di bida (e ultimo añanan) ta uno hopi discuti y a aumenta durante e actual pandemia.
Efectivamente ta un derecho di un persona escoge un morto digno y dicidi pa no pasa door di un proceso di sufrimento. Sinembargo mester adverti cu esaki ta solamente un parti di e historia, ya cu e reto ta, con logra cu e decision aki no ta wordo confundi cu ‘un bida den biehes of un bida cu discapacidad no ta bal pa biba. Nos ta bibando den un mundo cu ta rechasa e biehes manera algo “NO desea”.
Ta hustamente e percepcionnan social aki ta influencia grandemente “Nos forma di brinda servicio”… Hopi por corda con norma, balornan, amor y respet pa nos madushi y padushi tabata algo indiscutibel y automaticamente prome cu cambio di siglo.
Cambio di siglo a trece cambionan radical den mentalidad tocante nos grandinan y un sorto di falta di respet ora un grandi hera duna su opinion na un hoben. E pais na mundo cu prome a bini cu e ley di ‘Eutanasia’ y ayudo cu suicidio, ta madre patria Hulanda. Tambe tin hopi pais, incluso Aruba, unda tin medico cu ta dicidi si un hende di edad ta bay den cuido paliativo, si ta bale la pena mantene e persona di edad na bida of pon’e drumi…
Den e sentido ey e convencion di derechonan humano di hende di edad cu discapacidad, ta haci un yamada pa considera experiencia di bida, y comprende cu e experiencia di bida y cultura di e persona di edad cu discapacidad, tambe por ta uno rico y felis y cu no necesariamente ta uno yen di carga y stress, di sufrimento. Ainda tin hopi hende cu ta pensa cu e bida di e hende di edad (cu discapacidad) tin menos balor… AKI TA E MOMENTO CU MESTER HALA UN LIÑA Y BISA NO!!! Aki e convencion di derechonan humano di hende di edad cu discapacidad ta haci su entrada, unda cu mester reconoce e derechonanan igual y cu un bida no ta bal mas cu otro.
Avancenan importante: Por observa avance den pensamento tambe. Por ehempel awendia ta normal di papia di incontinencia y ya e tabu di papia di sexualidad ta casi nulo. Tambe tin hopi transformacion cu a tuma luga danki na envehecemento/’vergrijzing’ di nos poblacion. Por ehempel, 40 aña pasa no por a papia mes di busca pampers pa un persona adulto, tampoco tabata tin stul di baño of WC, un aparato di oido, baston pa un hende ciego, etc.. No solamente esakinan tabata caro, sino tambe hopi dificil pa haya localmente.
Na otro banda tin avancenan cu tin nan parti negativo tambe y cu ta resulta den abuso. Por ehempel e uso di pampers y/of pull-ups por resulta cu ta laga e persona di edad henter dia den su desperdicio hasta te na e punto cu e por haya herida di cama (decubitus).
Ademas a bira custumber di NO tin tempo mas pa hiba e persona aki WC y provoca pa e usa su musculo nan pa urina of bay af. Esaki ta resulta den musculonan floho y deterioro di tripa y tracto urinario.
Ainda falta: Maske cu ainda tin un gran parti di nos poblacion cu ta wordo exclui, tin un parti creciente cu ta forma parti di e conversacion, kibrando tabu, y ta participa na encuentronan social, y ta mas critico y contribui cu solucion pa motibo di nan experiencia di bida y profesionalismo.
Pero, ainda falta mas adaptacion di servicionan di supermercado, tienda, empresa, transporte publico accesibel, etc. Tambe falta profesionalnan (incluso di salubridad) cu ta comprende y por comunica (no traduci so) optimalmente den e idioma (no solamente Hulandes) di nan cliente/pashent di edad y/of cu discapacidad. NO pasobra un hende di edad y/of cu tin un discapacidad mester papia cu terminologia medico cu ne y spera cu e ta comprende, lague sinti cu abo si ta profesional y sa tur cos miho, papia manera ta papia cu un mucha chikito, of papia duro cu ne como si fuera e ta sordo of NO ta comprende bo.
Corda cu tambe tin hende di tercer edad cu tambe sa hopi y tambe tin mas experiencia cu bo!. Esaki tanto den sector turistico como local! Mas importante ta keda cu e discusion aki mester ta dirigi na ‘con yuda e cliente/pashent di edad’, con pa elimina bareranan pa e persona aki por participa optimalmente den e comunicacion y con cuidador, profesional, instancianan, gobiernonan, etc. por logra cu e persona di edad aki por haya/ricibi e sosten/ayudo necesario y optimal pa e por sigui disfruta di su bida.
En bes di pensa solamente den e condicion fisico/mental di e persona, mester cuminsa pensa tambe con pa haci ciudadnan of comunidadnan mas humano y accesibel: manera trapi adecua accesibel pa rolstul pa esnan cu baston/kruk, rollade, scootmobiel, aparato di oido, etc.
