Vecchia Estates orguyoso di lo bay construi AGORA cu ta e Family Justice Center

E cas nobo pa tres departamento crucial di husticia di Aruba

ORANJESTAD (AAN): Dialuna mainta durante un conferencia di prensa na sede di Gobierno, e compania Vecchia Estates, desaroyador di varios propiedad nan na Aruba ta emociona pa anuncia su reciente colaboracion cu Gobierno di Aruba pa un proyecto sumamente importante pa husticia di Aruba.

   Minister di Husticia di Aruba. Mr. Rocco Tjon a duna confianza na Vecchia Estates cu e prestigioso proyecto pa construi e edificio di AGORA. Situa den centro di ciudad y den mesun area di nos Corte di husticia, AGORA lo bira un facilidad moderno y e cas nobo pa tres departamento critico di husticia di Aruba cu ta: Bureau Slachtofferhulp (BSH), Bureau Jeugd- en Zedenpolitie (JZP) y e Family Justice Center (FJC).

   E firmamento di e (LOI) Letter of Intent ta marca e cuminsamento di e esfuerso remarcabel aki cu ta captura e vision comparti di ambos Gobierno di Aruba y Vecchia Estates. E ta simbolisa e inicio di un capitulo nobo unda lo mas primordial, ta e compromiso pa brinda servicio nan di husticia den una manera profesional y cu integridad pa nos hendenan di Aruba.

   AGORA, un termino presta for di Grecia Antiguo y ta nifica 'lugar di reunion' of 'asamblea'. E tabata e curason di bida atletico, artistico, spiritual y politico di e ciudad; un inspiracion perfecto pa e proyecto aki. Si nos repasa e estilo nan arkitectonico cu nos tin na Aruba, nos por mira cu pa siglonan caba, nos isla a habri su portanan pa inspiracion nan mundial creando un mescla harmonioso di influencia nan varia. Di nos cas nan di cunucu cu inspiracion nan Africano pa nos Fort Zoutman inspira pa arkitectura Hulandes te na e diseño Frances di nos lighthouse y e paisahe vibrante di nos centro di ciudad cu influencia Hulandes y toke nan Mediteraneo, como un isla multicultural, nos a mustra di ta domina un idioma arkitectonico universal.

   E herencia riko aki ta sigui awor cu AGORA. Su diseño, caracterisa pa simplicidad, simetria, proporcion, y harmonia, ta refleha e estilo arkitectonico cu por haya den hopi di e edificionan di mas importante di husticia rond mundo. E motibo ta cu e estilo aki ta resona cu e forsa y balansa, igual cu den e buskeda di husticia.

   Cu esaki, AGORA lo no ta unicamente un edificio nobo; sino un continuacion di Aruba su estilo arkitectonico comparti, mustrando Aruba su abilidad pa integra influencia nan global. Ademas su ubicacion perfecto dilanti corte di husticia di Aruba, ta agrega mas ainda na e nificacion di ta e cas perfecto pa e tres departamentonan di husticia aki. Den linea cu e nificacion historico señala,

e edificio di AGORA lo bira tambe un punto central na Aruba, un faro di husticia unda profesionalnan di Bureau Slachtofferhulp (BSH), Bureau Jeugd- en Zedenpolitie (JZP) y e Family Justice Center (FJC) por traha cu e hermentnan optimal y den un ambiente integro pa duna nan servicio, c’un maximo dedicacion.

   Vecchia Estates su pensamento semper ta, "Cada situashon nobo ta rekeri un arkitectura nobo y detaya." Pa mantene esaki, e edificio di AGORA lo ta construi cu e standardnan di calidad mas halto, reflehando e rekisito nan critico di e profesional nan cu lo ocupa e espacio aki. Nos ta mira dilanti na e terminacion exitoso di e edificio aki dentro di 1 aña.

   Vecchia Estates ta sinti un orguyo inmenso y humildad pa por ta forma parti di e proyecto esencial y bunita aki. Nos ta aprecia enormemente e confianza di Gobierno di Aruba den nos, y nos ta compromete pa entrega un edificio cu lo cumpli cu tur expectativanan confia den nos.

AGORA lo simbolisa un era nobo di entrega di servicio di husticia na Aruba y sirbi como un fuente di orguyo pa henter e comunidad.

Hunto, nos ta mira dilanti na creaccion di un espacio sigur, respetuoso y digno pa profesionalnan di husticia pa ehecuta nan rol critico pa nos comunidad.