Entrevista cu Michella Steenvoorde-Lacle
ORANJESTAD (AAN) – DIARIO a sinta cu e presidente di Comision Plan di Mayor, señora Michella Steenvoorde-Lacle, ken a duna nos un presentacion completo di locual ta e Programa “Plan di Mayor”.
Michella a cuminza pa menciona e partnernan cu ta parti di e Comision Plan di Mayor. Nan ta: Universidad di Utrecht, Directie Voogdijraad, CBS (Oficina Central di Estadistica), Universidad di Aruba, Bureau Sostene Mi, Centro Orthopedagogico, Centro Guia Mi, Fundacion contra Violencia Relacional, Departamento di Asunto Social y Corte di Husticia, y esaki ta pa bin cu un Plan di Mayor obligatorio.
Con e Plan di Mayor a origina?
“Con el a origina? Pasobra mi mes a traha 15 aña dilanti klas, 11 aña dunando les na Hulanda den scol secundario, y na Aruba pa 4 aña. Y mi mes ta bin di mayornan separa, y mi a ripara cu den mi ‘opvoeding’ nos ta un blended family”, Michella a menciona.
El a agrega cu dunando les, semper e tema tabata interes’e y na Hulanda, ora cu un mucha tabata laga su buki na cas, e tabata puntr’e di con el a laga su buki na cas, anto e mucha tabata contesta cu el a lague na cas di su mama, of na cas di su tata, pasobra e tabata biba un par di dia cerca su mama y un par di dia cerca su tata. Como docente, Michella a ripara cu esaki ta sosode hopi na Hulanda, y a conoce diferente mucha cu ta bin di “blended families” y cu no tabata asina facil pa nan.
“Te hasta nan a bisa mi ‘mi mayornan no mag divorcia ainda, pasobra nan mester traha nan plan di mayor ainda, y ainda nos ta den palabracion pa nan plan di mayor. E ora ey mi a cuminza lesa over di e ley, cu ta obligatorio pa nan traha un ‘Ouderschap Plan’, prome cu nan haya ok pa divorcia”, Michella a relata.
El a señala cu den e plan di mayor aki nan ta stipula con nan ta bay comparti e responsabilidadnan pa cu nan yiunan.
“E ora ey mi a bin Aruba for di Hulanda, mi a traha aki na Aruba, tabata tin yen di cos mescos cu e scol unda mi a traha na Hulanda, pasobra no tabata tin suficiente banki ni stul, mi a cuminza haci proyectonan, etc. Y ora e proyectonan a caba mi a ripara cu ainda a falta asina hopi, anto e ora ey mi a drenta politica”, Michella a indica.
Den diferente articulo den edicionnan siguiente, DIARIO ta sigui elabora tocante con a yega na e Plan di Mayor na Aruba, y su contenido, gradiciendo Michella Steenvoorde-Lacle, presidente di Plan di Mayor pa tur e informacion.
