ORANJESTAD (AAN): Diasabra atardi, den e prome siman di december por a mira masha tiki movecion ainda den centro di ciudad.
A pesar cu Pasco ta acercando, por a constata cu ainda e movecion pa loke ta bay haci compras no ta den 'full swing'.
Por a mira un cantidad di hende ta cana rond drenta den e tiendanan, pa wak kico tin cu por ta algo cu nan por ta interesa den dje.
Banda di esaki, a hala atencion e hecho cu varios negoshi a cera nan porta, otronan a muda pa un luga miho of mas strategico of tin algun cu te hasta mester a cambia nan concepto pa asina por a sigui drey.
Tabata masha tristo si pa mira cu algun negoshi a cera nan porta. Tabata un sorpresa si pa mira cu algun a opta pa muda y no keda den Caya Grandi, pero si den e becindario unda nan por ta mas visibel.
Combersando cu algun manager por a logra haya informacion cu un di e tiendanan cu tabata den area di Plaza Daniel Leo a dicidi di cera cambio di marca y awor nan tey si, pero cu un otro marca basta reconoci mirando e hecho cu loke nan tabatin tabata un marca 'upscale' pa damanan di mas edad, cu a cambia di 'target group' pa esnan mas jong. Esaki a trece cu ne cu e marca a bira un tiki inaccesibel pa e grupo meta nobo.
Di e forma aki mester a sinta 'brainstorm' un tiki y a bin cu un otro marca cu ta pa hende homber como pa hende muhe.
Mirando e desaroyo aki por mira cu den temponan dificil kisas lo tabata mas facil pa 'give up', pero sinembargo, por mira cu ta djis cuestion di analisa e mercado y pensa kico lo por ta un miho opcion na luga di dal porta cera.
Ban spera cu den e dianan aki, comercio di Caya Grandi por cuminsa haya un 'push' y cu mas hende por haya bon prijs y ofertanan interesante pa asina duna sosten na comercio.
