Abo tambe a mira nan den halto?
ORANJESTAD (AAN): Ultimo simannan por a mira varios di e tubonan aki ta wordo hisa na diferente lugar riba e isla. Algun hende eroneamente ta kere cu ta un sorto di antenna esaki ta.
Loke realmente e tubonan aki ta parti di e sistema di alerta yama ‘MHEWS’, y 16 di nan ta wordo instala tur rond di Aruba.
Pues ta speakernan potente tin riba nan, cu lo bay emiti sirena di alerta ora cu tin peligro y cu comunidad tin di pone atencion na esaki.
E sistema di MHEWS nifica ‘Multi-Hazard Early Warning System’, cu ta un sistema di alerta trempan multi-riesgo. Tur 16 tubo cu e alarmanan riba nan, lo garantiza cobertura pa henter e isla, emitiendo sirena y tambe guia di audio pa dirigi habitante- y bishitantenan di Aruba riba e medidanan cu nan tin di tuma den caso di emergencia.
Danki na e capacidad di sistema MHEWS, nan lo alerta comunidad na tempo di diferente catastrofe natural, manera inundacion inespera, horcan, tsunami, y temblor.
E tubonan di alerta aki ta hunga un rol crucial pa proteha bida y cuida propiedad riba Aruba. Nan ta wordo instala door di Crisis Management Office (CMO) cu antes tabata conoci como ‘Rampenbureau’.
E sistema aki lo funciona 24 ora pa dia, 7 dia pa siman, ta mehora preparacion y resiliencia di comunidad, posicionando Aruba como un lider regional den tecnologia pa reacciona riba catastrofe y demas alertanan trempan.
Esun aki ta instala den cercania di edificio principal di AZV cerca di Camacuri.
