Varios persona a sigui curso y a certifica pa duna informacion di calidad den temporada di Horcan

Durante e siman “Crisis Week”

ORANJESTAD (AAN) — E siman aki tabata tin apertura di e encuentro di Crisis-week, den cual tabata presente diferente persona di Reino Hulandes cu a bin Aruba pa e encuentro aki.

            Rino Hermans, Director di Crisis Management Office (CMO), den entrevista cu DIARIO, den entrevista cu DIARIO a bisa cu, desde 2019, Rein Hulandes ta bezig cu su “veiligheid strategie” pa Reino Hulandes y entre nan ta “Crisis Beheersing” y p’esey nan a cuminza cu nan reunionnan dos biaha pa aña.

            “Un biaha prome cu e temporada di horcan nos tabata na Den Haag pa evalua e region con bon prepara nan ta y kico mester prepara den caso si un di nos islanan wordo impacta y e di dos parti despues di e temporada di horcan, nos tabata den un di e islanan den Caribe, y e aña aki a toca Aruba, door cu e ta esun cu tin su ‘early warning system’. E delegacionnan cu a bin di tur region, 90 delegado di diferente ministerio di Hulanda tambe, a bin wak nos capacidad na Aruba, vooral den comunicacion, y hunto cu ne, nos a cuminza cu un trayecto cu nos ta certifica e funcionarionan cu ta bay duna comunicado na prensa”, Hermans a señala.

            Esaki kiermen cu e personanan aki ta wordo certifica y informacion pa pueblo no ta bin con cu ta. “E ta un curso cu tin su costo cu ne y cu Hulanda a sostene pa certifica, no solamente na Aruba, pero esnan di e region cu tambe a bula bin Aruba den e curso aki, di forma cu nos ta haya miho calidad di informacion cu ta bay bek na comunidad”, Rino Hermans a señala.