ORANJESTAD (AAN): Manera ta tradicion, Centro di Bario Savaneta ta organisa su Bazaar di Pasco pa trece e ambiente di Fin di Aña pa e bario di Savaneta y Aruba completo por disfruta.
Esaki ta tuma luga diasabra awo 30 di november 2024 for di 6.00 pm pa 10.00 pm.
E aña aki nan Bazaar ta grandi y varia hunto cu 22 vendor local. Lo tin bendemento di varios producto manera areglo y adorno di Pasco, acesorio, habon y scrub, ponche crema y mucho mas! Sin lubida nan bar y cushina cu lo ta bon surti cu dushi pasa boca pa e temporada.
Sigur no por falta e entretenimento durante e anochi. Lo tin presentacion di Lizienne Webb, Carolyne Kock y Chaz Models. Dj Oasis tambe lo tey pa entretene esnan presente hunto cu Aguinaldo Flor di Pasco y Tipico Pegasaya.
Centro di Bario Savaneta ta invita Aruba completo pa bin pasa un rato ameno cerca nan hunto cu bo famia y amistadnan y disfruta di e dushi temporada di Fin di Aña.
