Varios mucha a yega Santa Rosa pa participa den e Curso Basico di Plantamento

ORANJESTAD (AAN): Net prome cu scol a sera muchannan di scolnan Basico a ricibi “Buki di Pret” pa por a hiba cas.

 Den e “Buki di Pret” aki Departamente di Agricultura, Cria y Pesca Santa Rosa tambe a participa. Nan contribucion ta dos fecha di workshop di plantamento basico specialmente pa e muchanan.

            Mayornan a cuminsa reserva pa e dos fechanan cu tin disponibel manera cu “Buki di Pret” a indica. Cual ta e fechanan di 15 y 29 di Juli na Santa Rosa.

            Diahuebs mainta varios mucha a yega Santa Rosa pa asina participa den e Curso Basico di Plantamento. Tabata 2 ora parti mainta caminda Ludwig Rasmijn a percura pa e muchanan haya un guia den Santa Rosa pa asina admira e trabounan cu ta wordo hasi y tambe admira e bestianan cu tin den Santa Rosa.

            Despues a sigui e parti di “workshop” pa e muchanan di plantamente basico caminda e muchanan a siña con un simiya mester wordo planta adecuadamente via di un presentacion y despues esaki a sigui den e parti practico.

            Cada mucha un haya un pochi chikito caminda nan mester a pone gordura y efectua e plantamento di dos simiya di Boonchi Cunuco. Na final nan mester bay cas cu nan pochi pa asina sigui cuida esaki te ora cu e crece pa nan haya cosecha.

            Net prome cu e workshop a cuminsa e muchanan por a disfruta di un dushi mango fresco for di matanan di Santa Rosa. Nan a keda masha encanta cu nan mango.

            Cu un sonrisa grandi riba nan cara nan a ricibi nan certificado di participacion den e workshop di plantamento basico aki na Santa Rosa hunto cu “Buki di Pret”

            E otro fecha pa e workshop similar ta dia 29 di juli.