ORANJESTAD (AAN): E vuelo di Suriname Airways cu riba Diamars a haci un aterizahe inespera na Aruba, a haci esey debi cu un defecto a presenta durante e vuelo di Miami pa Paramaribo, abordo di e avion MD-83 cu e aerolinea di Suriname ta lease di World Atlantic Airlines.
Como cu e avion no por a sigui viaha mas e anochi ey pa Paramaribo, a dicidi pa pone tur pasahero den Hotel, pa riba Diaranson ora e avion keda cla, nan por sigui bula pa Suriname.
Un problema a presenta pa un pareha di Suriname, kendenan tin costumber di viaha regularmente entre Suriname y Miami, y cu nan ta viaha cu hopi placa y tin papeleo y permiso cu autoridad di Suriname, y tambe autoridad Mericano.
Pero ora cu nan a presenta Diaranson pa subi avion pa finalmente por yega Suriname, ata na Aruba nan a wordo gara door di autoridad local cu US$ 185.000 den nan poder. A hasta pone Afpakteam den wega aki, pensando cu lo por ta trata di labamento di placa.
E malasuerte di e pareha aki ta cu nan tin papel/permiso di autoridadnan di Suriname, y tambe autoridadnan Mericano pa bula cu e placa. Pa nan malasuerte e avion a haci un aterizahe di emergencia na Aruba, y na e isla aki sinembargo nan no tin permiso. Pero si acaso e avion no a ateriza na Aruba, nunca e lo a socede.
Pa colmo, prensa na Suriname awor ta reclama cu apart di e pareha ey, autoridad na Aruba inocentemente a detene un famia cu mucha chikito tambe.
E cos ta cu autoridadnan na Aruba a ripara cu e famia aki tin nada di haber cu e asunto, y a laga nan den libertad. Pero pa e ora ey, ya caba e avion MD-83 a lanta vuelo caba pa Suriname, y nan a keda atras.
E famia a keda sumamente disgusta, pasobra nan no por compronde di con oficialnan na Aruba por kere cu nan ta viahando hunto cu e dosnan cu a keda deteni. Aunke nan a bisa cu nan a wordo bon trata door di autoridad, pero awor ata nan den un Hotel sperando di lo por haya vuelo di Aruba pa Suriname. Pasobra actualmente Suriname Airways no ta bulando pa Aruba. E avion di Diamars a haci aterizahe debi na dificultad tecnico cu e aparato.
E otro dos persona keto bay ta deteni, pero ta mustrando cu nan tin OK di Suriname y OK di Merca pa por drenta/sali cu e placa, y cu e ta algo normal cu nan ta haciendo regularmente. E chens ta grandi cu Aruba tin di bay laga nan liber y duna nan placa bek. Pasobra nan a djis pasa accidentalmente di transito na Aruba.
