Departamento di DAS lo bay cobra e placa bek - ORANJESTAD (AAN) – Rudy Wester, Hefe suplente di e Seccion di Bijstand, den conferencia di prensa
a duna di conoce cu tin varios cliente cu a cobra bijstand sin tin derecho na dje, y awo tin cu devolve e placa y ta un suma grandi DAS ta hayando for di nan.
Pero tambe ta asina cu DAS a haya varios caso unda e persona tabata cobra tanto FASE, Bijstand y hasta Loonsubsidie hunto! Tur tres entrada hunto, siendo cu esey ta algo inaceptable.
“Bijstand nos ta cobra nos parti, y si enberdad e persona no tabata tin derecho riba e suma ey e ora nan mester cobra tur e suma back. E ta algo lamentable si, mi ta bisa. Nos ta duna hende un bijstand ta pa yude temporalmente, pa sobrebibi un rato, pero e tin cu sigui yuda su mes. Y un bez cu e haya un manera pa yuda su mes, e mester bin notifica e departamento na tempo, cu el a cuminza traha y no mester bijstand mas”, Wester a reitera.
Bijstand no conoce periodo di spera. E persona tin cu notifica mesora cu el a cuminza traha, y no aki dos of tres luna, pasobra DAS ta cobr'e e placa ey back.
DIARIO akinan ta remarca cu den e temporada ey di pandemia, cu a tuma nos tur pa sorpresa, hopi hende a perde trabao, tin famianan cu tata y mama a keda desemplea pareu, tin otronan unda un a keda cu trabao, pero trahando menos ora y hayando un salario, den algun caso, reduci hasta hasta cu 40% menos.
Tur hende mester a mara faha, priva di hopi cos, a baha gasto den alimentacion, tin hende cu hasta a haya desconexion di electricidad pasobra nan no por a paga, tin cu no por a sigui paga hipoteca, y asina por sigui menciona, y no tur a recupera ainda, pasobra nan ta sigui desemplea.
Anto ta masha tristo pa scucha di e Hefe suplente di Seccion di Bijstand, cu DAS a haya varios caso di hende cu a cobra FASE, plus bijstand, y tambe loonsubsidie! Mientras otronan a, y ta sufri berdaderamente di e situacion provoca pa Covid-21, tin hende cu a haci maluso di e ayudo cu gobierno a otorga na e momentonan di urgencia aki. Y na final, pa busca un problema pa nan mes, pasobra con cu bay bin nan no tabata tin derecho riba dje, y nan lo worde obliga pa paga e sumanan back.
