Clientenan na Aruba wardando casi un aña pa un piesa di auto yega for di China - *Costo di fletenan na diferente pais a subi entre 500% y 600%.
ORANJESTAD (AA): For di siman pasa DIARIO a bin cu un serie di articulonan mustrando riba e situacion cu comercial local y mundial ta bibando aden pa loke ta prijs di importacion.
Ya caba diferente pais a bati alarma, y Aruba no ta e excepcion mirando cu Camara di Comercio, Aruba Trade & Industry Association (ATIA) y Comerciantenan Uni Aruba (CUA) tambe a expresa nan preocupacion pa loke ta e aumento di prijs pa flete y e scarcedad di containernan.
Mester remarca cu comercio mundial y e wafnan principal di exportacion ta pasando den un di e peor crisisnan, despues di e cierenan recien, prolonga, di diferente waf clave den e mercado, principalmente, na e zona asiatico y di Merca.
Ya caba tabata tin e problema cu a surgi pa motibo di Covid, cu a obliga empresanan na isola estrictamente nan trahadornan, haci ciere di operacionnan y laga barconan yen di carga para. Como consecuencia, esaki a pone cu e costo di e fletenan cu ta wordo paga pa adkiri e servicio di transporte aki a bira cuater biaha mas halto, esaki segun e indice di containernan di Drewry.
E incrementonan ta evidente, ya cu entre aña pasa y 2021 ta calcula cu e e prijsnan di e fletenan, pa un container di 40 pia, a pasa na juli 2020 for di $2.000 na un balor di $10.000 na augustus di e aña aki y tin expertonan cu ta papia di costonan mas halto.
Entre e puertonan cu mas tabata tin congestion y buquenan stagna pa e cierenan, segun datonan di Bloomberg, por haya Ningbo, un di e centronan operativo mas grandi di Asia y cu ta retene 141 buque di e 339 cu a ingresa, manteniendo un congestion di 59,2% den su operacionnan. (wak grafico).
Otro cu ta presenta numbernan mayor ta Shenzhen na China, cu tin den spera 41 buque, di e 186 cu a ingresa, registrando 59% di congestion.
Na Merca e situacion no ta diferente, ya cu na e waf di Los Angeles - Long Beach tin 31 buque den spera pa mara na waf, di e 60 cu a ingresa, cu un congestion di 52% di henter e operacion. Ta calcula cu e totalidad di e buquenan cu ta para den e 12 puertonan principal, entre Asia y Merca, ta di alomenos 312.
Segun expertonan, e costonan di e fletenan na diferente pais a subi entre 500% y 600%.
For di e empresa di investigacion Sicex Promoting Global Trade por menciona cu ta kere cu e panorama maritimo lo tin cierto incertidumbre pa loke ta resta di 2021, ya cu a pronostica un scarcedad di containernan, pa loke e tarifanan di fletenan y e maneho di carga lo por ta un tema constante durante e aña aki.
Ademas, mester agrega cu e indice mundial di containernan ta resalta cu den e ultimo siman esaki a aumenta $204, y cu esaki lo sigui cambia conforme e desaroyo di e mercado.
Pero locual si por confirma ta cu ya caba tin un daño riba comercio, ya cu den solamente un siman e costo di e flete di un container entre Shanghái y Suramerica a subi di $2.000 na $7.000.
E crisis maritimo aki ya caba ta afecta Aruba pa motibo cu ta existi poco disponibilidad di containernan na e puertonan, situacion cu ta obliga e empresarionan na gasta mas placa den huur y den busca transportenan nobo di nan mercancia.
Manera DIARIO a trece dilanti tambe, henter e proceso logistico a wordo afecta, ya cu den e medida cu tin scarcedad di containernan, y cu e transporte ta bira un odisea, e prijs di e productonan tambe ta subi y e retrasonan den e entreganan ta cuminsa tuma lugar.
Por menciona, por ehempel, e caso di un cliente na Aruba cu a solicita un piesa di auto chines for di aña pasa na un agencia aki na Aruba y ainda te dia di awe, casi un aña despues e no por a haya e piesa aki. Esaki tambe ta causa disgusto cerca e clientenan cu tin cu warda asina hopi.
Asina por sigui menciona mas escenarionan.
Locual e expertonan ta señala ta cu e waf di Ningbo na China cu ta un di e centronan di exportacion mas grandi na mundo, su ciere ta afecta henter e mercado di exportacion mundial ya cu aunke tin e waf di Shanghái y esun di Hong Kong, esakinan no tin e mesun capacidad, generando congestion no solamente den e procesonan di carga y descarga sino den esun di nacionalizacion, depositonan, y registrando asina costonan fiho mas halto di importacion.
