Mara na e cantidad di casonan di Delta: - ORANJESTAD (AAN) – E hecho cu cancelacionnan di turistanan pa Aruba ta tumando lugar durante e luna di Augustus aki,
y cu por sosode tambe na September y incluso October, ta mara na e cantidad di casonan di Covid na Aruba, aworaki.
Señora Ronella Croes, CEO di ATA a indica esaki den conferencia di prensa, agregando cu e por mara tambe na e riesgo halto cu Aruba ta wordo asigna cune tambe.
Ronella Croes a splica cu e diferencia ta sigur, cu pa Merca pa varios luna, Aruba ta riba un nivel di halto riesgo pa loke tabata biahenan pa nos Isla, pero un diferencia ta, aworaki, cu tur informacion, preocupacion y enfoke ta wordo divulga via medionan internacional, riba e casonan di Delta. “Incluso mi por bisa cu e biaha aki Aruba a haya mas cobertura tambe, na e mercado Mericano sigur, ora cu a cambia e nivel di riesgo pa uno mas halto pa Aruba. Y kico esey kiermen? E conseho ta, basicamente, no biaha bay Aruba y esey ta mara na un nivel 4 na Merca, den e caso aki” CEO di ATA, Ronella Croes a declara.
“Algun hotel a comparti cu nos tambe cu den e lapso di algun dia, nan a mira nan a mira nan grado di recuperacion baha, na Augustus tambe. Mas cu claro, nos ta sigui compila tur e informacion aki tambe. Ademas, nos sa caba y ayera nos a haya un recapitulacion di tour, cu tin varios compania cu tabata tin gruponan te cu 300 persona pa cada biahe reserva pa Aruba, cu a dicidi di cancela nan biahe tambe y bishita di gruponan grandi asina, pa Aruba”, Ronella Croes a subraya.
Esaki den contexto di e totalidad cu ATA ta mira e panorama. Esaki ta negoshi cu no por recupera mas e aña aki. Pues, ta entrada cu no ta bay ricibi mas pa medio di turismo, y sigur pa hotelnan y tur cu ta depende di esaki. “Esaki ta un impacto cu dificilmente lo por logra recupera e aña aki”, Ronella Croes a reitera.
El a agrega cu for di aerolineanan y cruseronan no tin cancelacion cu a drenta, pero si den e ultimo dianan e mundo di aviacion a cuminza señala cu cuartal 3 di e aña aki lo ta uno hopi dificil, y cu seguramente no ta bay mustra e patronchi cu nan a mira te cu aworaki.
“Pues, nos ta keda pendiente di esaki pero bo ta keda tende e gritonan tambe di e mundo di aviacion. Nos ta spera cu e trayecto di recuperacion lo por ta bek na locual nos por a mira e ultimo lunanan. Ban spera di e Luna di November, bay dilanti”, Ronella Croes a expresa. Den otro articulo DIARIO lo elabora mas riba e declaracion di CEO di ATA.
