Tur cos ta mustra cu di cuatro ola di pandemia lo kibra tur record - * average semanal ta 123 caso pa dia
ORANJESTAD (AAN): E variante Delta di coronavirus a plama rapidamente den tur parti di mundo. Esaki ta hopi mas contagioso y su efectonan compara cu e virus original ainda no ta conoci. E realidad ta cu hopi hende ainda no ta ‘kere’ den e vacuna, apesar cu tin prueba tras di prueba cu esaki ta sigur y cu ta evita consecuencianan severo di Covid.
Aruba a drenta su di cuatro ola di e pandemia, y esaki ta mustra cu e lo kibra tur record di contagio pa dia compara cu e otro olanan. Segun resumen di casonan di COVID-19 di 13 di augustus, 123 persona a recupera y un total di 192 caso nobo di COVID-19 a keda registra, cu 20 ta turista y 172 ta residente.
E cifranan aki ta representa un 'Positivity rate' bou di residentenan di 31%. Cantidad di casonan activo di COVID-19 pa awe ta 1122 y cantidad di fayecidonan relaciona cu COVID-19 ta 115.
Datonan ta ilustra subida continuo di casonan nobo cu un average semanal di 123 caso pa dia y un average di 'positivity rate' semanal di 32% pa dia.
Hospital tin actualmente 54 persona interna di cual 7 ta den ICU, 41 riba piso general, 4 riba piso di maternidad (hende muher na estado) y 2 riba pediatria. E mayoria di persona interna den hospital no ta vacuna y p'esey e suplica ta na comunidad pa vacuna si ainda bo no a haci esaki. Vacunacion ta e miho proteccion contra e virus di COVID.
