Situacion di angustia y rabia ta manifesta su mes den Pueblo - *Cu bienestar total di Aruba na peliger mayoria kier medida pisa - *Sosten pa exigi vacuna pa trabou y actividad social como prevencion
ORANJEDSTAD(AAN)—Un situacion di angustia y hasta rabia ta podera su mes di Pueblo di Aruba, mientras e peliger di Covid-19 ta sigui crece.
Accion ta loke nan ta exigi mientras nan ta mustra cu personanan cu ta neglicia prevencion ta pone bida di tur hende na peliger pero tambe ta haci cu Aruba pronto no tin placa mas pa paga pa e gastonan di inocentenan cu ta cuida nan salud pero ta wordo afecta.
“Pone nan paga nan propio gastonan si nan no kier vacuna,” ta e demanda cu ta resalta.
Ta wordo mustra na e ehempel di Francia cu a dicidi cu personanan cu no vacuna ta paga pa tur gasto pa nan ricibi cuido.
Den combersacionnan cu DIARIO ta hiba cu miembronan di e comunidad di Aruba ta bini dilanti, cu e gran mayoria cu si ta cuida y ta tuma tur medida di prevencion contra e malesa, ta exigi medidanan mas pisa contra tur cu ta nenga di duna nan cooperacion na combatimento di e malesa, cu ta terorisa Aruba y ta pone bienestar di e pais y di henter e comunidad na peliger.
E segundo ola a presenta mientras cu urgencia Gobierno Wever-Croes a tuma medidanan pa Aruba sobrevivi riba tur tereno y habri caminda pa un normalidad den cual e programa di vacuna mester a hunga e papel principal.
Aruba tabata uno di e paisnan na mundo cu a cuminsa bolbe normalidad pero cu e advertencianan serio cu mester a tene na consideracion cu ainda Covid-19 ta un menasa mundial.
Na momento cu e cifranan a bolbe subi, mester a bolbe na medidanan pa frena e avance di e malesa, mientras cu a sigui pidi publico pa vacuna.
DIARIO na tur forma a sigui bati alarma pa e hecho cu un cantidad importante di ciudadano no tabata tene nan mes na reglanan cu a keda vigente y tabata haci caso omiso di e peliger di Covid-19 y sigur e variante Delta, cu a haci su entrada na India na December 2020 pero awe ta causa desaster humano na un parti grandi di mundo.
Vacuna ta keda e unico forma pa hende proteha su mes contra e malesa, mescos cu e medidanan di higiena y e distancia social necesario cu for di un principio tabata conoci.
Manera Delta a haci na cantidad di pais, el a presenta su mes tambe na Aruba cu a habri fin di siman den un angustia total pero tambe un actitud sumamente fuerte contra e cantidad di personanan cu ta nenga di mira e peliger serio cu e malesa ta forma pa tur hende y e forma cu e ta avansa den comunidad y ta ataca grandi y chikito sin reserva.
Mientras tabata prepara pa fin di siman ayera, DIARIO a mira un cambio serio den e tolerancia cu e mayoria cu si ta cuida su salud tin enfrente personanan cu ta nenga di tuma medidanan y kier sigui biba manera nada ta pasa.
“Bida di hende ta na peliger. Trabou ta na peliger. Un lockdown ta nifica fin di e plannan pa recuperacion di Aruba,” a wordo indica na DIARIO.
Protesta pisa a surgi cerca personanan cu ta di opinion cu mester awor uza medidanan pisa pa stop e abuso di parti di personanan cu ta sigui ehemplo di entre otro Hulanda y ta kere cu ainda nan mester por kibra e ley pa no subi caya, no forma grupo y trapa riba tur medida cu Gobierno mester bolbe tuma pa asina evita mas morto y dolor cerca hendenan cu a cuida nan curpa.
E reaccionnan cu DIARIO a ricibi ta di preocupacion grandi pasobra nan ta indica cu personanan cu a haci sacrificio ta dispuesto pa hasta confronta e personanan cu ta pone nan salud y bida na peliger na forma violento.
E reaccion aki ta bini di un sentido pisa di angustia y ansha pa sobrevivencia cerca personanan cu a cuida nan salud y salud di otro pa asina tambe cuida e bienestar general di Aruba.
Tin ciudadano cu hasta ta dispuesto pa voluntariamente yuda autoridad piki tur hende cu ta riba caya durante horario prohibi.
Mientrastanto publico ta aplaudi cu empresanan a cuminsa ta dicidi cu pa hende por traha pa nan, mester vacuna. Esaki sigur ta un medida adecua cu sector priva por tuma pero gobierno no por tuma sin mas debi na leynan.
DIARIO ta den contacto continuo cu Aruba den cual un grado halto di angustia pa e peliger directo di Covid-19 ta presenta su mes pero tambe un preocupacion serio pa loke mas medida lo nifica pa Aruba, cu a subi caminda pa recuperacion y awor ta mira bienestar di e comunidad na peliger.
