ORANJESTAD (AAN): Diasabra otro siman, esta 4 di Juni 2022 lo tuma lugar na Aruba, e di 6 edicion di Turismo Mundial 2022.
E certamen di beyeza aki a cuminsa na aña 2016 ora cu George Winterdaal y GLW Foundation (e mesun organizacion cu ta organiza Miss Teen Aruba International) a sinti e necesidad di sigui promove Aruba na nivel internacional y pa mustra cu e isla tin lugarnan bunita y cu nos tin hopi pa brinda e bishitantenan.
Na aña 2016 e start solamente cu categoria Teen y desde e tempo ey a haci varios adaptacion di agrega categoria extra. Pesey awor tin Teen Turismo Mundial, Miss Turismo Mundial, y Señora Turismo Mundial.
Pa bay bek den pasado, e ganadora di aña 2016 ta Linda Sibrian di El Salvador. Na 2017 ta Little Curacao Aleena Fransisco, cu Pre Teen Argentina Melanie Gonzales, y Teen Panama Ashley Isaza.
Na 2018 tabata Little Colombia Eileen Lesmes a gana, como tambe Pre-Teen Aruba Nubis Chandler, Teen Curacao Davienne Bislip, y Miss Venezuela Valentina Marcano.
Na 2019 e ganadora tabata Teen Panama Kimberly Winter, Miss Peru Nahomi Aguilera y Señora Aruba Miriam Contreras.
Na October aña pasa despues di e cancela e evento 5 biaha pa motibo di Covid unda e ganadornan a resulta Marle Hindersman di Paraguay categoria Teen, Sharleena Clarinda di Aruba a keda corona como Miss y den categoria Señora ta Vanessa Lyn di USA.
Entrante otro siman, for di 31 di Mei 2022 te cu 4 di Juni 2022 lo tuma lugar edicion number 6, unda tin Categoria Teen, Categoria Miss, y Categoria Señora.
E organizadornan ta gradici inmensamente Departamento di Cultura, Eagle Aruba Resort, Click Print, Gift Baskets, Swift Trading, Ella’s Accessories, Aruba Tourism Authority, Coco’s Restaurant, Patio 15, Olle Cosmetics, Aruba Fantasy Tours cu a yuda pa e evento a bira posible.
E certamen final mes lo ta Diasabra 4 di Juni 2022 pa 7:00 pm.
