ORANJESTAD (AAN): E ta un organizacion cu ya caba ta existi pa 20 aña. Y e cambio cu nan a logra trece desde 2002 te cu awor, ta algo admirable y sigur merece un felicitacion.
Esey ta e hecho cu na aña 2002, apenas 20 porciento di mamanan cu a caba di haya yiu, tabata duna pecho na nan baby. Pero awor na 2022, segun ultimo analisis, e cifra awor ta den 60 porciento cu ta activamente envolvi dunando lechi di pecho na nan baby.
DIARIO ta referi aki na Fundacion Pro Lechi Mama, kendenan e siman aki a tene un conferencia di prensa, pa anuncia cu nan ta bin cu un ‘Masterclass’ riba dunamento di pecho.
E conocido Minouche Lopez a hiba palabra, y el a splica cu tin dos miembro di directiva di Fundacion Pro Lechi Mama, kendenan a gradua pa e titulo di ‘International Board Certified Lactation Consultant’, pues nan a bira specialista riba tereno di lechi materno. Esey ta Marlene Stamper y Minouche Lopez, kendenan awor tin mas experticio y sigur yen amor ta trata di yuda mas mama posible.
Tambe Fundacion FPLM a anuncia directiva nobo, cu ta drs. Caroll Kock awor ta Presidente di e Fundacion. Minouche Lopez ta Secretaria. Marlene Stamper ta Tesorero, Jelka Gumbs-Astro como miembro, Ana Paola Rodriguez Castillo como miembro, y Francine Franca como miembro.
Como cu e cantidad di mama cu awor ta dunando pecho ta mucho mas, esaki sigur ta wordo considera como un gran logro impulsa pa e Fundacion. Pasobra nan meta principal tabata pa mas mama duna nan yiu lechi di pecho pa mas largo posibel.
Na 2007 e fundacion tabata envolvi tambe cu e logro di un ley den cua tur mama por duna lechi di pecho durante ora di trabao, sea ta pomp of direct.
Pa Lopez, e hecho cu nan ta existi 20 aña y ta logrando nan meta, nan tin deseo di celebrando esaki na un forma grandi. Y esey ta cu nan kier bin cu un Masterclass riba dunamento di pecho. E evento aki ta planea pa mañan Diasabra, 28 di Mei 2022.
E Masterclass ta titula “Empower Your Breastfeeding Journey”, y lo ta den edificio di ATIA na Pedro Gallegostraat 6, for di 8:00 am te cu 12:00 pm. Nan ta desea pa parehanan acudi na esaki, y lo cobra un contribucion pa pareha. Esnan cu kier acudi na e Masterclass, tin di registra na:
Esnan cu lo hiba palabra ta Minouche Lopez, Marlene Stamper, drs. Caroll Kock, y Laura Tromp, MBA.
