Varios buki di auto di Bonaire awor na Biblioteca di Aruba

Incluyendo ‘Isla di Lionel’

ORANJESTAD (AAN): Biblioteca Nacional Aruba a haya bishita for di artista y autor di buki pa mucha sr. Delno Lionel Alfeo Tromp, conoci tambe bou su nomber di cariño ‘Denchi’. Denchi a trece tres publicacion nobo pa e coleccion di biblioteca na Aruba. Denchi a enrikece e coleccion cu su obra ‘Het eiland van Lionel’, ‘Shi Helena ta conta’ y ‘E kabritu cu djent’i oro’ (de geit met de gouden tand’). E bukinan a bay tur scol na Bonaire cu ayudo financiero di entro otro Nederlands Letterenfonds.

   Isla di Lionel: Esaki ta un storia di soño, perdida y caminda bek pa cas. Lionel a lanta riba un isla chikito y ta soña di un mundo mas grandi. E ta bay studia den exterior y despues ta bolbe su isla ekipa cu hopi experencia, decepcion y speranza. Un storia di su welo ta e inicio di un buskeda pa un tesoro. Uno cu e ta bay busca hunto cu su amiga. Esaki ta bira un buskeda cu sorpresa y un caminda yen di birada, un biahe rico y bali la pena. E ilustracion riba e portada di e buki ta di Denchi mes.

   E kabritu cu djent’i oro: Esaki ta un buki na tres idioma, Papiamentu, Hulandes y Ingles. E ilustracion riba e portada di e buki ta di Denchi mes. “Riba un djarason, den kibra di marduga, na Tras di Montaña, a nase un mèki na kunuku di shon Bènchi. El a batisa e mèki ‘Pitu’. Sí, Pitu kabritu.”

   Asina e storia pa mucha ta cuminsa... E buki ta pa mucha y pa personanan cu ta desea di siña e idiomanan y pa esnan cu tin interes den e storia, balornan y manera di wak bida den Caribe. Esaki pronto lo ta den circulacion di biblioteca hubenil. Esaki ta un publicacion di Request Publishing.

   Shi Helena ta konta...un buki di kuenta i poesía: Esaki ta un buki di kuenta i poesia’ ta un buki di cuenta combina cu poesia bayendo bek den tempo y cu un toke cultural di norma y balor. E buki ta na tres idioma pa e yega na un publico grandi, hoben y adulto.

   Esaki tabata un proyecto hunto cu Fundashon Akademia Papiamentu cu tin como meta pa promove Papiamentu. (Y tambe Fundacion Munira). E buki aki tambe ta bay scol na Bonaire y tambe libreria. Pronto tur ta den circulacion na Biblioteca Nacional Aruba.