Clientenan a planta mata na Pasadia Briyo di Solo

Cabezante di Briyo di Solo, Jean’toine Perez:

• Cu ayudo di Santa Rosa y iniciativa di stagiair Lucien Peterson 

ORANJESTAD (AAN): Pasadia Briyo di Solo Aruba ta un centro di cuido pa adulto (16+ aña) cu limitacion intelectual, cu ta enfoca riba integracion den comunidad, independencia y desaroyo personal. Nan ta ofrece actividad creativo, social y di cuido propio pa stimula crecimiento y bienestar di cada cliente. E maximo cu Briyo di Solo ta tuma ta 60 cliente y actualmente nan tin 58 cliente ta bishita nan tur dia di dialuna pa diabierna.

   Diamars ultimo, Briyo di Solo, den colaboracion cu Santa Rosa y bou iniciativa di un stagiare Arubiano di CIOS Arnhem, Lucien Peterson, a organiza un actividad di planta mata den e hardin di e fundacion. E proyecto bunita aki tabata parti di su estudio final na Hulanda. 11 cliente di Briyo di solo a participa den e plantamento di mata aki añadiendo asina un actividad mas pa e clientenan di Briyo di Solo.

   Cabezante di Briyo di Solo, Jean’toine Perez - a duna di conoce cu entre otro a planta mata di Toronhil. El a expresa cu esaki ta un mata cu ta wordo hopi uza pa nan clientenan. Santa Rosa a colabora cu e matanan y tambe cu e gordura y tabata presente durante henter e actividad pa yuda guia e muchanan tambe. Señor Randy Maduro di Santa Rosa a yuda e muchanan planta mata y a comparti su conocemento cu nan di con pa planta y cuida e matanan.

   Señor Perez a gradici tur esnan cu a yuda pa haci e proyecto aki un realidad. Specialmente Santa Rosa y e hoben studiante Peterson. Segun señor Perez, e conocemento cu e clientenan di Briyo di Solo a haya, ta siña nan pa ta mas responsabel y nan por bay bek nan cas y planta nan mesun mata na cas y mantene esakinan tambe.