KRALENDIJK: Diabierna mainta Centro MOC di Wardacosta di Caribe Hulandes, a ricibi un yamada di urgencia pa un situacion di emergencia riba lama cerca di Bonaire.
Ta trata aki di un boto di piscado cu dos Boneriano abordo. Nan boto a cuminsa sink y nan a drenta den contact directo cu Wardacosta via Canal 16 di VHF Marine Radio.
Maritiem Operatie Centrum (MOC) mesora a pone personal di Helicopter lanta vuelo pa bula bay den direccion di e boto pa asina duna asistencia. Tambe autoridadnan na Bonaire a wordo informa di e situacion.
Mientras tanto dos boto cu tabata den vecindario di e incidente, a scucha e mensahenan cu tabata wordo transmiti riba VHF Marine Radio canal 16, y nan tambe a cuminza nabega rapido den direccion di e boto cu tabata sink, pa asina ofrece yudansa na e dos piscadonan. Ora cu nan a yega, un di e botonan a logra pa saca e dos piscadonan for di lama.
Riba isla di Bonaie mes, un team a wordo forma consistiendo di Douane, Marechaussee Real, y personal di Wardacosta. Nan a sali riba e boto di Douane, yama “Kinikini”, pa bay sostene e dos piscadonan aki. Na yegada, autoridad a tuma over e piscadonan for di e otro boto cu a rescata nan, y a trece nan bek pa tera. E dos piscadonan tabata den bon estado id salud, y no tabatin mester di asistencia medico.
