Revitalisacion di Oranjestad ta sigui cu restauracion y renobacion di e edificio “John G. Eman”

Minister Geoffrey Wever:

ORANJESTAD (AAN):  Despues di a haci un sondeo riba peticion di Minister di Finansa, Asunto Economico y Sector Primario, Geoffrey Wever pa wak cua di su departamentonan por bin den e edificio aki, na december 2024 Minister Wever a firma un intentieovereenkomst cu Aruba Bank N.V., Stichting Monumentenfonds Aruba y Nationaal Restauratiefonds pa e traspaso di e edificio jama “John G. Eman” den Caya G.F. Betico Croes pa Stichting Monumentenfonds pa bira e oficina nobo pa Centraal Bureau voor de Statistiek (CBS) y Sociaal Economische Raad (SER).

            Gobierno su compromiso ta pa preserva e identidad historico di Aruba, y na mes momento stimula un desaroyo economico urbano mas vibrante y funcional den centro di Oranjestad. Tur esaki a trece cune un proposicion concreto pa restaura y duna un destino nobo na e edificio emblematico di Aruba Bank N.V., jama “John G. Eman”, den Caya G.F. Betico Croes, cu lo bira un monumento proteha. E edificio “John G. Eman” lo bira e cede di CBS y SER. Tambe lo tin espacio pa 1 apartamento riba e promer piso y un espacio pa negoshi di horeca y teras riba e promer piso na banda di Caya G.F. Betico Croes.

            E reunion entre Minister Wever, Stichting Monumentenfonds Aruba, CBS y SER tawata pa revisa e progreso di e renovacion y haci cierto afspraken con e proceso lo sigui cana. Na e momento aki e proyecto ta den proceso di diseño y preparacion legal. 

Parti di e vision di revitalisacion

            E proyecto aki ta forma parti integral di e vision di Minister Geoffrey Wever y Gobierno AVP-Futuro pa revitalisa e centro di Oranjestad door di ubica departamentonan di gobierno den edificionan den centro di cuidad. Banda di e proyecto aki tin e renobacion di e monumento iconico Cas Veneranda cu ta den pleno proceso di restauracion, y ora cu esaki keda cla lo ubica Directie Economische Zaken aden hunto cu un espacio pa un negoshi di horeca. E edificio unda Ministerio Publico tabata ubica, ta un otro edificio den renobacion hunto cu FCCA unda cu lo bin 19 apartamento pa studiante y espacio comercial pa crea un fluho di bishitante den e area urbano di Oranjestad.

            E diferente proyectonan andando riba iniciativa di Minister Geoffrey Wever tin como meta pa trece bida bek den caya y transforma nos centro di cuidad pa uno moderno y atractivo unda hende por biba y traha.

            Minister Geoffrey Wever ta gradici Aruba Bank N.V. y Stichting Monumentenfonds Aruba pa tur nan trabou y esfuerzo pa hasi e proyecto aki posibel.