Varios baki di sushi pa tene Aruba limpi durante Semana Santa

Campamento responsabel

ORANJESTAD (AAN): Durante e siman di Semana Santa, un gran cantidad di ciudadano a sali pa campa rond di e isla, buscando recreaccion den seno familiar y cu amigo. Esaki ta trece momento di alegria y refleccion, pero tambe ta representa un reto pa nos medio ambiente. Specialmente den e areanan popular di campamento, e acumulacion di desperdicio ta un preocupacion creciente.

   Diahuebs 17 di april, Serlimar hunto cu Bureau City Inspector, riba iniciativa di Prome Minister Mike Eman, a tuma e pasonan pa yuda alivia e situacion di desperdicio na manera responsabel. Serlimar a instala un cantidad adicional di baki grandi, strategicamente posiciona den e areanan cu mas concentracion di esnan campando.

   Bakinan a wordo poni na: Baby Beach (2 baki), Surfside (1 baki), Bushiri beach (2 baki), Eagle (2 baki), Fisherman’s Hut (1 baki), y Arashi Beach (1 baki).

   Den un acto simbolico, Prome Minister Mike Eman a tira e prome saco di sushi den un di e bakinan grandi di Serlimar, enfatisando e importancia di limpiesa colectivo y e rol di cada cuidadano den cuida nos beachnan.

Serlimar y Bureau City Inspector pa algun aña ta reparti saconan di sushi na tur tent riba beach, pa motiva esnan campando pa deshaci di nan desperdicio na manera responsabel. Ademas Serlimar lo aumenta e frecuencia cu ta recoge e bakinan di sushi durante e periodo di campamento pa evita acumulacion y contaminacion di nos lama y beachnan.

Prome Minister ta urgi esnan campando pa gosa, pero tambe pa cuida y ta pidi tur hende pa tene bista riba otro, specialmente riba e muchanan, pa evita situacionnan lamentable.

   Prome Minister Eman ta gradici Serlimar y Bureau City Inspector pa nan compromiso continuo den proteccion di nos medio ambiente y bienestar di comunidad. E esfuerso conhunto aki ta enfoca riba un meta comun: un Aruba mas limpi, mas sigur, y mas dushi.