“Variante Delta ta domina tur infeccion di COVID cu tin na Aruba: nos ta casi na 100%”!

ORANJESTAD (AAN) – Gerrit Tromp, Epidemiologo di Departamento di Salud Publico, a participa den e conferencia di prensa den cual a duna un update di e situacion di Covid-19, den nos pais.

Gerrit Tromp a enfoca un rato riba e infeccionnan door di Covid-19 cu ta tumando lugar na e momentonan aki, na Aruba. Pa cuminza, el a bisa cu DVG ta mirando aworaki, door di diferente factor, un incremento di e casonan di contagio, mescos cu na diferente parti di mundo manera Merca mes y Hulanda.

Tromp a referi na e prome grafico cu a wordo mustra, pa splica un poco kico nan ta pensa cu por a pasa, cu a crea e ola di infeccion cu ta tumando lugar, aworaki.

Un linea cora ta duna e contagio di personanan cu tin historia di viahamento, cu ta nifica cu nan a importa e virus. E otro linea cu ta uno geel, cu ta indica e contagio cu a tuma lugar localmente mes, pues cerca ciudadanonan sin un historia di viahe.

El a splica cu den Luna di Juli, e casonan bao nos hendenan local y tambe esnan cu historia di viahe, a subi mescos y a bay parallel cu e incremento cu por mira na Merca y na Hulanda. Esaki kiermen, cu e gran mayoria di e casonan cu a wordo importa, e tempo aki, a bin for di Merca y Hulanda, incluyendo e variante Delta.

Despues cu e variante Delta a wordo introduci den nos comunidad, mas tanto for di esnan cu historia di viahe, a plama mas y e contagio bao hende sin historia di viahe a aumenta drasticamente.

E Epidemiologo a para un rato na e positivity rate, cu semper DVG ta keda wak, cu ta e porcentahe di testnan positivo di esnan sintomatico y esaki a keda subi bao di nos localnan. Esaki ta un indicador cu DVG ta keda uza, pa por tin un bista di berdad kico ta pasando eyfo cu e contagio, cuanto caso nan ta detecta y cuanto ta faya. Si wak positivity rate hopi mas halto, kiermen cu nan ta fayando mas caso.

Nan ta tuma e testnan haci den e test center, di esnan cu ta sintomatico. Esakinan nan ta tuma como e teller y e number di tur test cu ta wordo haci na esnan sintomatico.

 “E motibo pa cual nos ta haci esaki ta pasobra nos sa cu tin hende cu ta test cu sintoma den otro laboratorionan priva, por ehemplo, pero esakinan ta wordo uza como prueba pa bo bay biaha. Door cu esaki ta bruha cu esnan asintomatico, e por duna un imagen distorciona, pasobra e number ta depende di cuanto hende mester di un test pa bay biaha. Pesey nos ta calcula e positivity rate asina”, Gerrit Tromp a indica.

Pasando na e siguiente slide, cu ta regarda na e  data di secuencia cu nan ta haya, entre otro, for di Hulanda cu ta wak e secuencia genetico, Tromp a splica cu desde algun siman caba Laboratorio Hospital ta haciendo “typering” cu PCR, cu basicamente ta purba di detecta algun parti di e virus cu ta specifico na  variantenan.

“Anto, nos por a mira eigenlijk cu na ultimo siman di Juni, e introduccion di e variante Delta na Aruba, y esey a bay pareu cu un incremento di nos incidencia. Esaki ta debi cu e variante Delta ta increiblemente contagioso, e ta wordo pensa aworaki cu e ta 50% mas contagioso cu e variante Alfa”, e Epidemiologo a bisa mustrando e columnanan blauw riba graphic.

 “Variante Delta ta domina tur infeccion di Covid cu tin na Aruba. Nos ta casi na 100%!” e Epidemiologo a subraya.