Docter Wilmer Salazar ta enfatiza: - *No ta berdad cu variante Delta ta un efecto di e vacuna!
ORANJESTAD (AAN)- Durante e Diadomingo di Vacunathon, Dr. Wilmer Salazar tambe a duna prensa un declaracion, unda el a enfatiza riba e importancia di e ricibi e vacuna completo contra Covid-19.
El a cuminza pa splica cu hende sano, deportistanan hoben, y hende di mas edad cu ta haya e virus por desaroya diferente sorto di complicacion.
Incluso hende asina hoben, cu ta haya e covid-19 di manera leve, por sufri di consecuencia posterior na covid. Esaki debi cu e virus aki su comportacion, no ta solamente den e area respiratorio: nanishi, garganta, pulmon, pero tambe e por afecta tur nos sistema, tur organo vital: cerebro, curazon, riñon, cuero, adernan, y cu lo por causa consecuencia incluso fatal. Esey ta loke mundo ta experenciando actualmente cu mayoria di variante cu ta circulando, entre nan Delta, na unda na Brasil ta reportando casonnan desde luna di Februari, di muchanan, y hendenan entre 18 y 35 aña cu ta presenta complicacionnan severo di covid-19 cu mester di hospitalizacion, y incluso tin morto, pa motibo cu nan no a premira e parti di vacunacion, y aworaki nan tin un problema di salud hopi grave. Tambe na Merca, hoben y adultonan mayor tin casonan di covid-19 cu mester di hospitalizacion debi na complicacion. Dr. Salazar a menciona India tambe, na unda a surgi e variante Delta, cu no a cuminza durante e vacunacion sino prome. Salazar a bisa cu si e no ta era, el a wordo detecta na luna di November 2020, y e pais aki no tabata tin aplicacion di vacuna.
“Algun hende ta bisa cu e variante Delta ta efecto di e vacuna. No ta berdad! E variante Delta a surgi door di e problema di infeccion constante di esnan cu no tabata vacuna, na un poblacion ya cu cierto condicionnan y cu tabata super pobla y cu actualmente ta sufriendo un situacion grave di salud, pasobra mayoria di hospital no tin e capacidad pa tuma nan”, dr. Salazar a subraya.
Delta tin un caracteristica importante, y esaki ta cu e ta hopi contagioso. Ademas di e sintomanan cu tambe por presenta den otro variantenan, e ta afecta oido. Un persona cu infeccion di Delta por perde su oido, y ademas di esey e ta causa problema di coagulacion, e ta forma clot na dedenan, pia y man cu e persona por perde nan si no wordo trata na tempo.
