Grupo anti vacuna a manifesta dilanti di Ritz Carlton Hotel

ORANJESTAD (AAN): Un grupo den e comunidad di Aruba a dicidi di no vacuna.

Algun miembro di e grupo aki a dicidi di bay manifesta dilanti di Ritz Carlton Hotel contra e proceso di vacunacion contra Covid-19 aki na Aruba, den cuadro di e vacunathon cu a tuma lugar diadomingo.

Ni un hende ta obligando e grupo aki pa vacuna, pero nan si kier stroba esnan cu si a vacuna of cu kier vacuna door di bay manifesta te hasta violando e medida di 'samenscholingsverbod' (aglomeracion riba caminda publico).

Na Aruba tin hopi persona cu no a vacuna ainda y papiando cu nan, dialogando cu nan ta logra hopi mas cu atacando nan, asina Prome Minister Evelyn Wever-Croes a expresa diasabra durante un conferencia di prensa extraordinario.

El a haci un apelacion na henter comunidad di Aruba pa en bes di subi Facebook, yama radio, zundra, critica, manifesta of saca odio contra esnan cu no kier vacuna, pa uza e energia ey den un forma positivo pa convence cada dia un hende mas pa bay vacuna.

Si ta un hende cu literalmente ta bisa cu e no kier vacuna ta respet'e, pero e mester carga e responsabilidad, e mandatario a expresa.