Rulienne Arends, Trahado Preventivo FADA:
ORANJESTAD (AAN) – Rulienne Arends, Trahado Preventivo di FADA, a sigui splica den entrevista cu DIARIO, cu e uzo di Vape tambe tin su peligro cu ne, pasobra e ta contene droga.
Di Marihuana nan ta crea azeta cu ta wordo uza pa Vape, y aki na Aruba ta keda mescos. Diferente adulto ta bisa esaki , y no por kita afo cu, cu otro substancianan por haci mesun cos.
El a agrega cu loke ta heroina y fentanol, originalmente nan ta pildora, nan ta bira puiro, y un bes cu nan ta wordo kima, nan ta bira azeta cu nan por hinca den vape, y naturalmente e tin su consecuencianan tambe.
Rulienne a subraya cu tin cu ta bisa cu ta algo legal y nan por “get away” mas facilmente, pasobra hendenan no ta bay ripara, no ta haya sa, pero e ta keda mesun señal y sintomanan cu si wordo uza den otro forma.
Relaciona cu apertura di aña escolar, siman pasa FADA tabata tin tres mainta di informacion, pa scolnan Kleuter, Basico, y Secundario.
“Tur e cabesantenan, docentenan y tur cu por a forma parti di esaki tabata presente unda cu nos por a presenta tur loke FADA tin pa ofrece pa e aña escolar aki, pa loke ta adiccion y salud mental. Nos a duna un informacion amplio riba esaki y nos tin cu bisa cu e reaccion ta super bon, sumamente positivo y e agenda for di aki pa December ta yen cu diferente tema. Y mi tin cu bisa cu e tema di Fentanol a wordo pidi, a puntra nos pa esaki. E no ta un tema cu nos ta duna normalmente, pero ora cu tin peticion FADA ta haci presentacion pa scol”, Arends a menciona.
El a agrega cu un scol basta avanza a haci peticion pa e tema di Zombie, unda cu naturalmente e presentacion lo wordo haci. Rulienne ta ripara cu tin hobennan hopi interesa pa wordo informa tocante e diferente droganan incluyendo Fentanol, y FADA tin e cautela pasobra nan no sa e motibo cu nan kier sa, pero e hobennan ta wordo informa debidamente kico ta e riesgonan pa nan salud na corto plazo pero logicamente na largo plazo tambe.
