ORANJESTAD (AAN): Departamento di Salud Publico hunto cu Ministerio di Salud di Aruba den cuadro di e Campaña Nacional di Vacunacion
ta lansa su siguiente fase di promocion di salud cu referencia na e lucha contra COVID-19 riba nos isla, caminda ta sigui enfoca ariba e importancia pa logra inmunidad colectivo y pa e diferente gruponan den nos sociedad vacuna.
Un promedio di 55% di nos comunidad completo (0-100 aña) ta vacuna na e momento aki pa cual motibo nos tin pa sigui enfatisa ariba e importancia pa vacuna. Mas hende vacuna Aruba tin, menos contagio cu complicacion lo tin y menos posibilidad di hospitalisacion y morto.
Segun analisis di cifranan actual, e categoria di edad cu ta mas vulnerabel debi na un grado di vacunacion hopi abou ta entre 12 cu 44 aña (esnan mas activo) y tambe 80 aña bay ariba.
E yamado ta pa e grupo di edadnan aki, pero tambe tur esnan cu no a vacuna ainda pa vacuna y compronde cu e vacuna di Pfizer cu Aruba ta suministrando ta dunando resultado. Segun datonan local, e gran mayoria di hende contagia den hospital cu complicacion no ta vacuna, loke ta genera den nos comunidad mas medida cu e respectivo consecuencia, gastonan medico extra, un percepcion negativo internacionalmente y hopi presion social, emocional y economico.
Vacuna no ta solamente un acto di solidaridad y responsabilidad conhunto caminda ningun hende por keda atras; pero mas tanto, vacuna ta un acto di amor pa bo mes, bo famia y bo pais! Por fabor, no duda mas: VACUNA! #DVGAruba #VacunaTaUnActoDiAmor #DosisPaBiba
