ORANJESTAD (AAN)- Durante e reunionnan cu stakeholders Diaranzon mainta, Formacion Gabinete Wever-Croes II a reuni tambe cu United Farmers Aruba.
Señor Gregory Fung-A-Fat cu a atende e reunion aki a bisa cu e reunion a bay den bon seno y nan a trece 5 punto cardinal padilanti.
Entre otro nan a papia pa por tin claridad na ora yega e momento cu sector primario, pasobra a tende na varios occasion cu kier a trece un pilar nobo, y e pilar ta di agricultura y United Farmers Aruba kier sa kico e pilar ey ta focus riba dje, entre otro e parti di seguridad di cuminda, e parti cannabis etc.
Fung-A-Fat a sigui bisa cu tambe a papia tocante e pidimento di peticion pa haya un pida tereno pa planta. Pa entre otro kico ta e cosnan cu bo mester sa di momento cu bo haci aplicacion y tur e permisonan cu ta bin cune. No solamente pa e permisonan comercial pero tambe esnan cu kier hacie como hobby. Pasobra esnan cu tine como hobby ta hopi importante pa e diversidad den futuro pa Aruba su agricultura.
A papia tambe di good agriculture practices. Pasobra segun Fung-A-Fat, nan kier sa si nos kier bira un pilar, kico ta e reglanan y kico cada certificacion cada hende mester tin pa asina por bende nan producto na diferente lugar. Mesun reglanan cu tin pa ora di importa, si ta mesun reglanan pa ora produci y ki sorto di calidad ta ofrece.
Fung-A Fat a bisa cu a papia tambe riba e topico di cannabis y hemp. A wordo papia den pasado riba e partido di cannabis cu tin full un bureau cannabis y diferente otro sectornan. Pero United Farmers como organizacion nunca a wordo informa kico ta e stapnan y con e proceso ta bay. No tin claridad den esey. United Farmers kier sa précis pa asina reacciona tambe y no solamente hacie pa hendenan internacional pa bin duna nan punto di bista, pasobra tin hende local cu ta motiva pa hacie.
Ariba e pregunta con e benta di agricultornan ta bayendo awor den pandemia, Sr. Fung-A-Fat a bisa cu localmente e benta no ta problema, pero tur kier haci nan lugar mas grandi of kier hacie mas comercialmente y eynan ta unda nan ta struggle.
Y e struggle ta caminda aplicacionnan ta wordo haci pa tereno, pero despues ta tende cu mester di ta permiso of esaki no a wordo regla. Tin hopi puntonan cu hendenan no a pensa riba te awor. Y esey ta e puntonan cu a wordo treci padilanti, pa mañan ora cuminza un industria, mester percura pa tur cos ta hinca aden pa no tin sorpresa pa ningun hende.
