ORANJESTAD (AAN): Nan tin un gerente general nobo! Raoul Lemmerling ta originalmente di Hulanda y lo brinda su experiencia internacional na Aruba Marriott.
Esey ta informacion cu DIARIO ta dispone di dje. Lemmerling lo supervisa e operacion diario, e desaroyo di e personal, presupuesto, planificacion financiero y satisfaccion di huesped pa Aruba Marriott Resort & Stellaris Casino, Marriott’s Aruba Surf Club y Marriott’s Aruba Ocean Club.
Lemmerling ta un hotelero pasiona cu mas di 20 aña di experiencia, kende a atende Hotel Management School na Amsterdam prome cu el a forma parti di e cadena di Marriott. el a desaroya su carera como gerente den Europa por medio di diferente funcion nan operacional y comercial, incluyendo General Manager pa e famoso Westin Paris Vendome y London Marriott County Hall.
Lemmerling no ta un desconoci pa e maneho di varios hotel, como cu mas frecuente el a sirbi como Cluster General Manager pa siete hotel di Marriott na London. Y awo e lo trece su talento nan na nos “One Happy Island” di Aruba durante un temporada unda biahamento ta back den su temporada halto.
“Mi ta sinti honra pa por dirigi un compleho y resort riba clase mundial, especialmente durante un momento asina importante pa e industria di biahe,” a comparti Lemmerling. “E ta un inspiracion pa wak asina hopi turista y doño nan di timeshare regresa Aruba di bishita y pa wak nos team contento haciendo locual nan ta gusta, cual ta pa ofrece e miho servicio na nos huesped nan. Tin un demanda evidente pa por relaha y biaha, y mi ta hopi entusiasma pa por traha cu e team dedica aki pa asina yama un caluroso bon bini na nos turista nan”
Lemmerling ta papia bon Hulandes, Aleman, Ingles y Frances y ta desea di siña e idioma di Papiamento y añadi esaki na su repertorio, como tambe establece relacion nan duradero cu e comunidad local.
“Cu un carera exitoso cu hopi logro nan dentro di e famia di Marriott, Raoul ta e fit perfecto,” segun Carolina Voullieme Leon a bisa, kende ta Directora di Benta y Mercadeo. “Mirando pa futuro, nos ta sigur cu Raoul lo usa su experiencia y experticio pa pusha nos team pa sigui prospera y garantisa satisfaction di tur huesped.”
