HPV awor pa mucha muhe y mucha homber
ORANJESTAD (AAN): Durante e Campaña Nacional di Vacunacion Escolar 2026-2027, seccion Jeugdgezondheidszorg (JGZ) di Directie Volksgezondheid (DVG) ta ofrece vacuna contra HPV na mucha muhe y, cuminsando e aña aki, tambe na mucha homber den klas 6.
HPV, papiloma virus humano, ta un virus hopi comun cu por causa diferente tipo di cancer mas laat den bida. Tanto hende muhe como hende homber por haya e virus y por desaroya cancer relaciona cu HPV.
E vacuna ta wordo ofreci na un edad tempran pasobra e ta brinda e miho proteccion prome cu un persona wordo exponi na e virus.
Vacunando tanto mucha muhe como mucha homber, Aruba ta amplia e proteccion contra HPV y ta contribui na prevencion di diferente tipo di cancer den nos poblacion manera entre otro cancer na boca di matris, cancer den boca y garganta, cancer na penis y mas.
Promer cu vacunacion, mayor of representante legal ta ricibi informacion y un formulario di permiso. Sin permiso, JGZ no ta administra e vacuna.
Pa pregunta of mas informacion, tuma contacto cu seccion JGZ na 522-4200. Vacuna contra HPV ta un oportunidad pa proteha nos muchanan awe contra cancer den futuro.
