ORANJESTAD (AAN): Fundacion Ultimo Deseo Aruba (FUDA) a indica na DIARIO cu nan tin un noticia special pa anuncia.
Esey ta cu Grupo di Betico, cu ta un di e gruponan local mas stima, a uni su mes cu FUDA y asina a bira un embahador di FUDA.
Ta trata di un colaboracion special, ya cu FUDA no ta djis duna bon bini na un embahador nobo, sino un grupo completo cu 16 embahador.
E embahadornan nobo ta: Gos Oduber, Jouel Croes, Maikito Croes, Miguel Genser, Dennis Rasmijn, Rudney Lopez, Hemmy Croes, Michael Croes, Papa Maiky Croes, Dennis Oduber, Dino Luidens, Angelo Kock, Ofo Croes, Jaderick Croes, Jeremy Bonarriba y Rendell Silva. Nan ta un parti di curason di Aruba.
Grupo di Betico a wordo crea 57 aña pasa door di Betico Croes, y a nace for di e tradicion bunita di fin di aña. tocando Dande.
E grupo ta toca y canta musica tradicional di Aruba, pero tambe ta conoci pa compone y trece musica di temporada di fiesta di Aruba, y musica contemporaneo. Tanto na Aruba como den su presentacionnan den exterior, e Grupo di Betico a logra uni comunidad ya comberti nan tur den un gran fiesta.
Djis e vinculo fuerte ey cu cultura y comunidad di Aruba, ta haci e colaboracion aki cu FUDA bira asina special.
FUDA ta dedica su mes pa yuda hendenan na Aruba cu ta sufri di malesanan terminal y/of ta pasa henter dia riba cama y ta depende di transporte den ambulans. E fundacion ta haci posibel pa nan cumpli su ultimo deseonan sin ningun costo.
Pa por yuda mas hopi hende posibel, ta importante pa tur habitante na Aruba haya sa cu FUDA ta e fundacion cu ta eynan pa nan.
“Nos ta increibelmente orguyoso y nos ta sinti nos mes enormemente honra cu Grupo di Betico a uni cu FUDA como grupo,” ta loke Renate Raven a bisa, kende ta president di Fundacion Ultimo Deseo Aruba (FUDA).
“Pa nos, esaki ta mucho mas cu un simpel rol di embahador. Grupo di Betico ta representa un parti maraviyoso di Aruba. Nan musica, e hsitoria, y nan vinculo cu comunidad ta yuda FUDA cera conoci cu mucho mas hende”.
Via di e colaboracion aki, tanto FUDA y Grupo di Betico ta spera di por aumenta mas e reconocemento di e nomber FUDA y yega na mas hendenan di Aruba.
Pasobra ora cu mas hende haya sa cu FUDA ta existi, mas deseo por wordo cumpli. Pesey FUDA ta duna Grupo di Betico un caluroso bon bini como embahadornan nobo.
“Nos ta inmensamente agradeci pa e confianza cu Grupo di Betico a deposita den FUDA y pa nan disponibilidad pa compromete hunto cu nos fundacion y nos publico importante. Nos tin hopi gana di logra cosnan grandi hunto pa hendenan na Aruba.”
Cu e colaboracion special aki, FUDA kier demostra cu hunto por haci un diferencia positivo: Ningun hende mester keda sin haya nan ultimo deseo pasobra un transporte den ambulans ta necesario.
Fundacion Ultimo Deseo Aruba (FUDA) ta uno dedica na apoya hendenan den nan fase terminal of cu ta constant riba cama, y cu ta depende riba transport den Ambulans, y ta desea di cumpli un ultimo deseo.
FUDA ta haci e deseonan aki bira realidad na forma gratis y ta depende totalmente di donacion, sponsor, boluntario, y apoyo di comunidad di Aruba. Nan ta riba Facebook tambe pa haya mas detaye.
