Hose Figaroa di FTA
- Hotelnan ta sigui habri y trece trahado di exterior
- Nan ta ocupa puesto di gerencia y abusa di trahado
ORANJESTAD (AAN): Hose Figaroa di Federacion di Trahadonan di Aruba (FTA) a splica den un entrevista cu DIARIO, e situacion actual di necesidad di trahado na Aruba, mientras hotelnan nobo ta habri, hendenan cu ta bin di afo, cu no conoce nos leynan y por kere cu aki nan por haci loke nan kier haci. Den su opinion ta importante, pa cuminsa, esnan cu ta busca trahado pa posicionnan halto, fuera di duna nan training con pa haci nan trabao, pa por lo menos duna nan un training riba e leynan laboral na Aruba, con nan mester atende cu trahado. Pasobra no ta posibel cu un hende ta bin Aruba y impone reglanan of e falta di reglanan cu ta existi den otro paisnan na Aruba.
Tur trahado tin nan derechonan, cu mester wordo respeta, manera por ehempel un pago di overtime ta algo cu nan no por faya riba dje. Si e trahado ta sinti cu nan no ta cumpli cu ne, e mester reclama esaki tambe na Departamento di Labor.
Trahadonan tin mas opcion, manera sindicalisa nan mes. En berdad, na momento cu un hende ta den nan tempo di prueba, pero esaki no ta un excuus pa dunado di trabao haci abusonan. Segun Figaroa, durante tempo di prueba ainda e dos partido no ta mara na otro, pero esaki no ta un motibo pa no cumpli cu leynan vigente y respeta e derechonan di e trahado. El a bisa cu esaki ta algo cu nan ta hopi pendiente di dje, y si kehonan yega cerca nan na FTA, nan lo actua mesora riba dje.
Figaroa a enfatiza cu mester kibra cierto abuso laboral di biaha, y no laga esaki crece, pa asina e dunado di trabao of hefe di personal compronde bon cu na Aruba tin reglanan cu mester wordo respeta. Ley no ta permiti abuso di trahado.
Un di e preocupacionnan di FTA, ta riba e situacion di trahadonan cu a perde trabao relativamente lihe, cu ta algo cu nan ta bay papia cu Gobierno, mirando cu nan a dicidi di duna un exoneracion pa trahadonan nobo wordo importa, mester ta hopi cauteloso cu un dunado di trabao dicidi cu nan tin hende local den servicio, pero lo hala nan un banda awo cu nan por 'importa' trahado mas facil. En berdad tin necesidad pa trahado den momentonan aki, pero no por ta asina cu ta bay schuif trahado local y cu kisas ta den servicio caba, pa hinca trahadonan di stranhero. FTA lo keda vigila e situacion pa cualkier tipo di abuso di esaki, pa no yega na un escala cu mañan e ta completamente fuera di control.
