Dr. Jayburtt Dijkhoff di Instituto di Calidad:
*Berdad na algun instancia esaki ta tumando lugar sin ningun credencial
ORANJESTAD (AAN) – Instituto di Calidad a wordo lanta pa traha e maneho y Inspectie ta esun cu ta controla, y ambos instancia mester bay traha hunto pa wak kico ta pasa den practica eyfo.
Asina Dr. Jayburtt Dijkhoff a splica den entrevista cu DIARIO, relaciona cu e practicanan di beyeza cu ta tumando lugar na Aruba, unda tin biaha tin angua envolvi den e tratamento.
Dijkhoff a indica cu e punto ta cu desde cu e ley di AruBIG a pasa, tin algun tipo di tratamento cu ta wordo prohibi y solamente ta aceptable si esaki ta tuma lugar na man di un persona cu a wordo entrena pa haci esaki.
“Entre otro, ta para hopi cla den ley cu inyecta (pasa angua) den cualkier tipo di forma pa bora e cuero y drenta den e curpa humano, ta prohibi. Solamente esnan cu ta entrena y cu ta registra den Instituto di Calidad mag di haci esaki, bao di cierto condicionnan.
“ Berdad ta cu tin indicacion cu den diferente instancia di beyeza esaki ta tuma lugar sin ningun clase di credencial, y vooral hendenan ta bay pa esaki pasobra e ta sali mas economico. Pero segun mi tin un dicho na Spaño cu ta bisa cu ‘lo barato sale caro’ y hopi hende no ta conciente cu bayendo pa mas barata, bo ta tuma un riesgo extra riba bo, cu no necesariamente ta bay sali bon.
“Ora e sali malo eynan ta bira e parti fastioso, cu tin biaha ta coregibel pero tin biaha no ta coregibel. Hasta tin caso den pasado cu hende a bay y hasta a fayece; kiermen ta algo hopi serio. Na momento cu un ciudadano tin pregunta semper por yama Instituto di calidad y Inspectie (IVA) tambe, si e tratamento di beyeza cu e kier tuma por tin consecuencia cu ne of no”, Dijkhoff a indica.
Encuanto control, esaki ta cay bao di Inspectie (IVA). Dijkhoff tin entendi cu IVA ta controlando algun lugar, pero e problema ta cu si nan ta bay cu man hopi duro, mester bay cera practicamente tur spa.
“Mirando cu inyeccion no mag door di hendenan cu no ta entrena, Y tampoco tin un maneho traha specificamente pa SPA. Esey ta un tool cu falta ainda, pa defini con nos ta bezig ta controla e lugarnan di beyeza. Berdad esaki ta un punto di atencion, y nos ta wardando e Decreto Nacional aki tambe, pa ta sigur berdaderamente, ken ta e profesionalnan cu por inyecta tambe. Tin biaha nos ta haya hende cu ta un tiki entrena y esey ta haci cu e historia ta cambia un tiki si nan por of no por haci uzo di cierto anguanan. E maneho ey mester bin pa trece claridad y esey nos ta spera na comienzo di 2025”, Dr. Jayburtt Dijkhoff a señala.
