Tisa LaSorte, CEO di AHATA:
*Personanan cu ta na Aruba caba ta haya permiso pa subi mercado laboral
ORANJESTAD (AAN) – Tisa LaSorte, CEO di Aruba Hotel & Industry Association (AHATA), a bisa den entrevista cu DIARIO, cu e problema di scarcedad di trahado pa sector Horeca ta sigui.
Manera ta conoci gobierno di añanan pasa, a duna permiso pa mas hotel habri na Aruba, y ora companianan grandi ta habri na nos pais, esey kiermen cu nan ta bay atrae trahador, cu tur nan derecho, pero esey ta nifica trahado di otro companianan.
LaSorte a subraya cu esaki no solamente ta sosode den turismo pero nan ta atrae trahado di tur tipo di sector, y loke ta bay haya ta un situacion cu hopi mas compania ta sufri cu no tin suficiente trahado pa duna servicio optimal. Pues, esaki ta un problema general na Aruba su economia, y no ta un problema di hotel so.
“Esey nos ta keda busca solucion, nos ta traha cu gobierno y cu otro wetgeving organizaties pa wak ki solucion nos por bin cu ne. Ultimo, a bin cu un maneho nobo temporal pa un aña of un aña y mey, cu lo yuda un tiki, cu ta pa laga personanan cu ta na Aruba caba, por drenta mercado laboral. Por ta nan no tin derecho di drenta mercado labora, pero nan ta na Aruba caba, di un manera eficiente, pues nan tin cu pasa un proceso legal ainda, pa nan haya un permiso”, Tisa LaSorte a menciona.
Un ehemplo cu LaSorte a trece dilanti ta un persona cu ta studia na Universidad di Aruba, cu visa di studiante, e ta haya permiso pa traha tambe, kizas un part time. Otro ehemplo ta un persona cu tin permiso pero kier trece su casa, ken no por a traha. Pero cu e maneho nobo e casa tambe por traha.
“Asina nos ta purba pa trece solucion, no solamente importa mas hende pero cu hende cu ta na Aruba caba por participa den e mercado laboral”, Tisa LaSorte a duna di conoce.
