Richenel Stamper, PR di DPL:
ORANJESTAD (AAN): Den entrevista cu Matutino DIARIO, e Relacionista Publico di Departamento Progreso Laboral (DPL), Richenel Stamper, a sigui splica tocante e charla tocante “Entrevista Laboral” cu lo tuma lugar na Centro di Bario Noord, Diahuebs 4 di September venidero, di 7 pa 9 or di anochi.
E charla aki ta door di un invitacion cu CBN hunto cu CEDE Aruba a haci DPL, y e facilitador ta Richenel Stamper mes.
“E meta di e charla aki ta pa duna informacion tocante kico ta un entrevista laboral, con bo ta prepara bo mes, kico pa bisa y kico pa no bisa, con bo ta bisa, e documentonan rekeri, e proceso mes cu mester pa bo yega na un entrevista. Tur esaki ta bay wordo splica riba e dia aki. Pues, mi ta invita tur esnan cu ta buscando un trabao eyfo, pa atende e charla aki. E ta gratis y ta kita so dos ora di bo tempo di 7 pa 9 or di anochi y bo por pasa libremente na Centro di Bario Noord, unda nos ta dunando bo tur e tools y tips practico, pa yuda abo, haya un trabao mas lihe posible”, Richenel Stamper a describi.
No ta e intencion pa trece CV (Curriculum Vitae) e anochi aki, pero señor Stamper a bisa cu semper e ta disponible pa hende bin cerca dje pa e tira un bista riba nan CV prome cu presenta un aplicacion pa trabao.
“Nos lo papia tambe di esey den nos charla, pasobra CV tambe ta un parti cu, awendia, hopi hende con pa hinca e informacion den otro, kico si y kico no ta hinca aden, y por mira cu den e mercado laboral, no solamente DPL pero otro instancianan eyfo tambe ta enfocando riba e parti di CV. Pasobra, hopi biaha, si bo CV no ta bon, e persona no ta haya un entrevista”, Richenel a añadi.
