Everon: *Un di e enfokenan ta mas stabilidad y confiabilidad di e red di coriente
ORANJESTAD (AAN): Diahuebs mainta Utilities Aruba N.V a tene un conferencia di prensa, pa papia riba e direccion cu e compania lo tuma hunto cu Aruba Wastewater Sustainable Solutions N.V(AWSS).
Director di Utilities Joseph Everon a splica cu e aandeelhouder ta Gobierno di Aruba, Utilities ta e Holding, mientras cu e subsidiarionan ta AWSS, NV Elmar y WEB Aruba NV.
“Conhuntamente nos ta bay traha riba e plannan energetico y e transicion di energia pa futuro y pa loke ta AWSS, como subsidiario nos ta take care di locual ta wordo yama den comunidad, awa sushi”.
Pa loke ta e plan nacional pa futuro nos tin diferente area di atencion cu nos ta bay dedica na dje y tambe nos tin nos strategianan delinea, conhuntamente cu WEB Aruba NV y NV Elmar, pa nos por logra e metanan cu nos in nos dilanti, segun Everon.
El a sigui bisa cu un di e enfokenan grandi di Utilities ta e estabilizacion di e red di coriente.
Eynan e enfoke ta bay ta pa un bon stabilidad y confiabilidad den e red di coriente.
“Locual nos ta bay haci tambe ta enfoca hopi riba e automatizacion di nos red y tambe e ‘smart metering’, pa na un manera adelanta nos por anticipa si tin algun storing”.
Nos ta enable progreso di energia renobabel. Un di nos enfokenan grandi ta tambe pa reduci e emision di carbon.
Nos ta traha hopi tambe riba e ‘distributed energy resources’, esta nos kier facilita e proceso pa loke ta e maneho di por ehempel solar panels na cas y companianan. Pesey nos tin mester di un red automatisa y stabil. Hunto cu WEB nos ta trahando riba esaki, segun e director di Utilities.
El a sigui bisa cu un parti hopi importante tambe ta pa tin un prijs pagable.
Ta bay tin un enfoke grandi pesey riba e structura di tarifa, programanan di spaar energia pa ta mas eficiente y educa hende con pa traha cu programanan di spaar energia.
“Ta bay ta hopi importante tambe pa electrifica por ehempel transporte publico”.
E mehoracion mas grandi tambe cu nos kier trece ta mas uzo di energia renobabel.
Esey nos ta bay haci a base di mulinanan di biento, esta nos ta bay expande na Vader Piet cu e tereno di Rincon.
Nos ta bay expande e capacidad di e mulinanan di biento eynan, hunto cu WEB y Elmar.
E di fase ta cu nos ta bay ‘Re-Power’ Vader Piet, segun Everon.
El a splica cu baterianan ta hopi importante ora ta papia di haci mas uso di energia renobabel y pesey WEB ta bezig cu e ultimo estudionan, pa haya sa e capacidad y grandura di e bateria cu mester uza.
Tambe ta studia e automatizacion cu mester bin cune, cu ta wordo yama ‘Energy Management System’.
Everon a indica tambe cu ta bay cu un fase 2 pa loke ta e solar park na San Nicolas(Sunrise Solar Park). “Pa loke ta e regulacionnan, ta hopi importante pa nos traha riba e governance y statuten ndi Utility Group den su totalidad y nos ta bay traha riba e interconnection policy”.
Pa loke ta energia renobabel, nos tin cu bin cu un maneho cu ta actual aworaki, mirando cu e tecnologia di por ehempel inverters a cambia hopi. Nos ta bay bin tambe cu e regulating framework, segun e director di Utilites.
